DILI, STLTIMORLESTE.com – Prezidente Republika (PR), Jose Ramos Horta ho Primeiru Ministru (PM), Kay Rala Xanana Gusmão felisita ka fahe domin Natal ba pasiente sira, iha Hospita Nasional Guido Valadares (HNGV).
Prezidente Republika, Jose Ramos Horta no Primeiru Ministru, Kay Rala Xanana Gusmao, hatoo felisitasaun Natal 2025 no ksolok tinan foun 2026 nian ba pasiente sira iha Hospital Nasional Guido Valadares (HNGV), Bidau, Sabadu (20/12/2025).
Felisitasaun nee hatoo direta husi I Visi Primeiru Ministru, Francisco Kalbuadi Lay, nuudar reprezentante Prezidente Republika no Primeiru Ministru, akompanha husi Adjunta Xefe Kaza Sivíl Prezidensia Republika, Henriqueta Maria da Silva, no Asesor ba Servisu Sosiedade Sivíl no Asuntu Sosial Prezidensia Republika, Quintiliano Moniz, ho ekipa organizadora.
Aleinde hatoo felisitasaun, reprezentante sira mos fahe parsel ba pasiente sira hamutuk 400-resin, husi sala baixa ba ema boot, sala partu inklui sala ba bebe nian iha HNGV.
Tuir Visi Primeiru Ministru katak, atividade refere inklui iha programa “Natal ba Povu” husi inisiativa Prezidente Ramos Horta no kolaborasaun ho Governu hodi fahe ksolok no lori pasiente sira atu sente Natal nia sentidu domin, ksolok no fraternidade.
Hafoin simu parsel Natal, pasiente ho família hatoo sira-nia agradesimentu no espresa sira-nia haksolok tanba simu felisitasaun husi lideransa Estadu nian no sente katak maske iha situasaun inesperada, maibe Prezidensia Republika no Governu nunka haluha atu fahe ksolok ho sira iha tempu Natal.
Atividade nee sempre organiza kada tinan durante mandatu Prezidente Republika atual hamutuk ho Governu.
Tuir observasaun neebe mak jornalista STL hetan iha loron boot Natal Prezidente Republika, Jose Ramos kolabora ho IX Governu Konstitusional fahe ksolok Natal liu husi fahe Parsel Natal ba labarik sira iha Orfonatu, inklui Prizioneiru sira ida Dili, Ermera Suai, Inklui mos fatin neebe halibur labarik oan kiak sira, no kbiit laek sira hanesan Iha Orfonatu Madre Alma, Santa Clara, Madre sira Salele no fatin seluk tan.
Fahe parsel Natal nee hodi halo kontente labarik sira iha tempu Natal hodi hatudu domin Prezidente Republika no Primeiru Ministru ba nia povu sira iha loron boot nee.
Parsel Natal sira nee entrega husi ekipa Prezidensial Republika liu husi Asesor ba Servisu Sosiedade Sivíl no Asuntu Sosial Prezidensia Republika, Quintiliano Moniz, ho ekipa Prezidensia Republika.
Jornalista: Emerenciana Pinto
Editora: Carme Ximenes
