DILI, STLTIMORLESTE.com – Membru Parlamentu Nasional (PN) husu Ministeriu Transporte no Telekomunikasaun (MTK) liu-liu Diresaun Nasional Transporte Terrestre (DNTT) atu koloka sinais tranzitu ba estrada publiku husi Dili ba munisipiu sira neebe identifika hanesan risku ba asidente, hodi evita asidente.
Tuir Deputadu Bankada Partidu CNRT, Marcos Xavier hateten, uluk Governu seidauk reabilita estrada diresaun husi Dili ba Munisipiu, numeru asidente kiik iha fatin-fatin
Nia dehan, hafoin Governu reabilita estrada Diresaun Dili ba Munisipiu sira, ikus-ikus nee asidente sempre akontese iha fatin hotu-hotu, tan nee nia husu ba DNTT atu koloka sinais Tranzitu iha estrada publiku hodi evita asidente.
“Uluk estrada aat asidente oituan deit, maibe agora estrada nee kaber ona, ema halai makaas tanba la iha sinal ida tau iha estrada ninin nee. Maibe husu ba Ministeriu Transporte no Telekomunikasaun liu-liu Diresaun Nasional Transporte Terestre tenki tau sinais sira iha fatin-fatin risku, nunee ita lao nee ita bele hatene,” hatete Deputadu Marcos Xavier ba jornalista sira iha resintu Parlamentu Nasional, Segunda (29/12/2025).
Deputadu Marcos hatutan, presiza koloka sinais Tranzitu tanba estrada trosu husi Dili ba Baukau iha animal barak, tan nee se sidadaun sira halai la kuidadu bele hetan asidente.
Nia mos husu DNTT atu hasai karta kondusaun ba motorista sira tenki haree didiak sira nia konhesimentu ba sinais tranzitu molok atribui karta kondusaun.
“Se hasai karta kondusaun ba sidadaun sira tenki ho kuidadu pelemenus nia bele hatene katak iha fatin ida nee ema tau sinal iha neeba atu lao neneik, laos lao ho velosidade hanesan nee,” adianta nia.
Maske nunee reprezenta povu nee mos preokupa ho motorista balun neebe la tau atensaun ba sinais Tranzitu neebe DNTT koloka ona iha estrada publiku sira, wainhira hetan ona asidente mak foin hakfodak, iha fatin sira nee monta sinais Tranzitu sira katak uza kareta ho motor velosidade labele liu velosidade hanesan nee.
Tanba nee nia husu ba sidadaun sira neebe mak atu ba selebra tinan foun iha idak-idak nia munisipiu atu halai nee hodi evita asidente.
“Maibe hanesan sidadaun ida hakarak husu ba ita nia sidadaun sira neebe ba férias iha idak-idak nia munisipiu karik ho loron boot halai ho kuidadu tanba estrada Dili ba Baucau, Dili ba Maliana, Dili ba Aileu, ba Lekisa nomos Dili ba Ermera atu halai kuidadu hodi evita asidente,” dehan nia.
Molok nee Deputadu Bankada Partidu CNRT, Mateus da Cruz husu Diresaun Nasional Transporte Terestre (DNTT) atu aservisu hamutuk ho Diresaun Nasional Seguransa Rodaviaria hodi kontrola kondisaun transporte publiku sira neebe sei tula populasaun ba idak-idak munisipiu atu selebra natal no tinan foun.
Jornalista: Alberto Menezes
Editor: Xisto Mendonça
