DILI, STLTIMORLESTE.com – Prezidente Republika (PR), Jose Ramos Horta hatete, durante mandatu nia sempre buka tau matan ba sidadaun Timor oan neebe moris ho vulneravel.
Liafuan nee Prezidente Republika Jose Ramos Horta hatoo ba jornalista iha Palasiu Prezidensial Nicolau Lobato, Bairo Pite, Segunda (29/12/2025).
Nia hatete, nuudar aman no avo i nuudar mos Prezidente Republika Timor Leste, nia nafatin buka tau matan ba ema neebe mak vulneravel liu liu estudante sira.
Xefe Estadu sente orgulhu bainhira haree estudante husi Biblioteka Infantil iha Palasiu Prezidensial hamutuk ho funsionariu sira hatoo votus parabens ba nia, nuudar aman no Prezidente Republika nafatin buka apoiu labarik no sidadaun neebe presiza tebes tulun.
” Labarik sira iha Timor vulneravel tebe-tebes, barak sei kiak liu tanba família kiak, hetan problema, dezafiu oin-oin, ita hotu-hotu hatene. Tanba nee nuudar ema no sidadaun hau sempre buka tau matan ba sira, fo domin ba sira, maibe laos domin deit, maibe mos apoiu,” dehan Horta.
Prezidente mos kongratula ba IX Governu konstitusional neebe lidera husi Primeiru Ministru Kay Rala Xanana Gusmao, tanba kaer ukun ho sensivel tebes ba ema kiak sira iha Timor Leste.
“Iha governu ida hanesan maun Xanana kaer ho sensivel tebe-tebes ba ema kiak, ema fraku ba labarik sira,” dehan nia.
Xefe Estadu hatutan, sentru ou biblioteka infantil Iha Palasiu Prezidensial ida nee loke hahu kedas iha premeiru Prezidensia no ohin loron sei kontinua ba oin, ida nee sai hanesan modelu ida bele loke iha munisipiu hotu hotu.
Iha selebrasaun aniversariu Prezidente Republika neebe halao iha Palasiu Prezidensial, estudante husi sentru ou Biblioteka Infantil Iha Palasiu Prezidensial mak hananu, nunee funsionariu no estudante siraba hatoo votus parabens ba Xefe Estadu.
Jornalista: Emerenciana Pinto
Editora: Domingas Gomes
