DILI, STLTIMORLESTE.com – Tribunal Judisial Primeira Instansia Dili (TJPID) liu husi desizaun ikus ba krime Arma Branka, deside absolve arguidu ho inisial AdFA.
Iha desizaun nee, Juiz prosesu Fransisca Cabral deklara katak, depois rona tiha deklarasaun husi arguidu, lezadu no sasin sira, Tribunal konklui katak, faktus neebe konsta iha akuzasaun la provadu.
Tanba nee, ikus mai Kolektivu diside hodi absolve arguidu, husi krime neebe Ministeriu Publiku akuza ba.
Tuir akuzasaun neebe iha katak, iha loron 19 fulan Marsu tinan 2022 lezadu FdR, para nia motorizada ida besik fatin neebe arguidu aluga ba.
Arguidu ho kondisaun lanu, koalia ba lezadu atu labele para motor besik fatin neebe arguidu aluga ba.
No mosu diskusaun entre arguidu no lezadu, arguidu halai ba foti katana ida iha uma laran, no koalia katak atu ta lezadu.
Rona ida nee halo lezadu tauk, halai ba subar no ikus mai Polisia to ba iha fatin akontesementu.
Tanba nee MP akuza arguidu komete krime rua, ameasa no Arma Branka.
Ba krime Ameasa lezadu hakarak dada fila, tanba nee Tribunal homologa tiha. No Tribunal diside, kontinua julga arguidu ba iha krime Arma Branka.
Hatan ba akuzasaun nee, arguidu deklara katak, momentu neeba arguidu ho lezadu la kondisaun lanu. Maibe lezadu maka para motor iha odamatan neebe arguidu sira asesu lao ba mai, tanba nee arguidu mos hase lezadu.
Arguidu deklara, iha diskusaun nee lezadu maka halai tama ba uma laran foti katana ida sai mai liur atu ta arguidu.
Arguidu deklara tan, lezadu maka kaer katana, tanba nee maka banhira Polisia mai foti lezadu no arguidu ba presta deklarasaun, Polisia haruka arguidu fila mai uma, no lezadu maka detein iha sela Polisia tanba kaer katana.
Alende nee lezadu deklara katak, momentu neeba ho arguidu sira kos hamutuk, lezadu ba sosa modo no fila husi sosa modo para motor iha lezadu nia kos oin, maibe arguidu hase lezadu.
Lezadu deklara, nia hatan ba arguidu katak motor nee para iha hau nia kos oin, tanba sa tenke muda. Ho ida nee arguidu kondisaun lanu hela, ba foti katana ida atu ta lezadu, ho ida nee maka lezadu tauk hodi halai ba subar tiha iha lezadu nia kos laran.
Lezadu deklara katana neebe iha, kos nain nia oan mane maka ba foti iha lezadu nia kuartu hodi entrega ba Polisia, no informa katak katana nee maka lezadu foti atu ta arguidu.
Audensia julgamentu nee prezide husi Juiz Kolektivu, Fransisca Cabral, Jose Escurial, Juiz Estajiadu nain ida, Ministeriu Publiku reprezenta husi Prokurador Nelson Magno, arguidu hetan asistensia legal husi Defensor Publiku Marsal Mascarinhas.
Jornalista: Terezinha De Deus
Editora: Carme Ximenes
