DILI, STLTIMORLESTE.com – Deputadu sira neebe reprezenta povu iha Parlamentu Nasional (PN) liu husi Bankada CNRT ho FRETILIN husu ba Governu iha tinan 2026 atu servisu ho responsabilidade ba nesesidade populasaun nian.
Deputadu Bankada CNRT, Marcos Xavier hatete, rekomenda deit ba Governu liu-liu 2026 servisu tenke ho responsabilidade, orsamentu neebe aprova ona iha Parlamentu Nasional tenke servisu ho kuidadu no uza ho kuidadu.
“Atu rekomenda deit ba Governu liu-liu tinan 2026 servisu ho responsabilidade, orsamentu neebe mak aprova ona iha Parlamentu Nasional tenke servisu ho kuidadu no uza ho kuidadu ba nesesidade populasaun sira nian iha Timor laran tomak,” dehan nia iha Parlamentu Nasional, Segunda (30/12/2025)
Nia dehan, ho responsabilidade sira nee hanesan membru Parlamentu sei tau matan no fiskalizasaun neebe mak rigorozu ba aktus governante sira neebe mak iha tinan 2026, osan neebe mak aprova tiha ona tenke benefisiu duni ba povu no rai ida nee.
Iha fatin hanesan Prezidente Komisaun C, Deputada Cedalizia Faria dos Santos hatete, rekomenda ba Governu tanba halo orsamentu nee pur programa, entaun haree mos ba reseitas interna rasik, dehan fundu petroliferu neebe mak jatrapalha, nunee husu ba Governu tenke ezekuta orsamentu diak tuir planu annual.
“Hau rekomenda ba Governu, tanba ita halo orsamentu nee pur programa, entaun ita haree mós ba ita nia reseitas interna rasik, ita dehan fundu petroliferu neebe mak ita atrapalha, entaun ami husu ba Governu katak tenke ezekuta orsamentu nee diak tuir ita nia programa IX Governu nian no planu annual neebe mak ita haree ona,” nia dehan.
Nia salienta, karik orsamentu balun neebe mak iha planu nia laran kada programa maibe sente katak la nesesidade entaun diak liu lalikan ezekuta.
“Ezemplu ita dehan ba viajen estranjeiru, se ita presiza liu husi zoom miteeng deit ka la presiza ba direita karik buat sira hanesan nee ita bele diminui, maske orsida iha final ninia ezekusaun la sae maibe ita bele halo ona poupansa ba ita nia orsamentu rasik,” nia akresenta.
Governu haree despeza neebe mak laos nesesidade liu bele redus maske iha orsamewntu maibe hanoin katak neebe mak importante ba povu nia moris, komisaun C husu ba Governu 2026 tenke ezekuta orsamentu ho didiak hodi fo ninia impaktu nee direta ba povu.
“Labele ezekusaun diak maibe ita la hatene osan nee ba ida neebe, entaun ida nee mos ita la konkontra atu akontese,” tenik nia.
Entretantu Deputadu Bankada FRETILIN, Antoninho Doutel Sarmento hatete, tinan oin mai nee Governu tenke repoin fali ninia komprisiu sira neebe durante nee promete ba povu.
“Tama ba tinan foun 2026 husu atu IX Governu repoin ninia kompromisiu sira neebe halo ba povu, tenki tau ba pratika. Katak IX Governu labele sai deit governu jardineiru ba sidade ida, maibe governu nee transformasaun povu,” nia tenik.
Jornalista: Alberto Menezes
Editor: Xisto Mendonça
