DILI, STLTIMORLESTE.com – Eskola Bazika Fillial (EBF) 12 Outobru Tasi-Tolu presiza tan manorin nain 3, hodi hanorin estudante sira iha eskola nee, tanba daudaun nee profesor nain 2 tama bá reforma no nain 1 halo transferensia.
Diretor Eskola EBF 12 Outobru Tasi-Tolu, Fernando Barreto dehan, Professores neebe tama bá reforma iha nain 2 no 1 seluk halo transferensia. Neebe situasaun eskola nee agora daa dadaun menus ona manorin nain 3, tanba neemak presiza fali Professor nain 3 hodi subtitui fali bá sira nia fatin.
“Ami nia profesor sira iha eskola nee hamutuk 38, maibe ami sei presiza tan nain 3. Tanba nain 2 tama reforma no nain 1 seluk halo transferensia,” dehan nia bá STL iha Tasi-Tolu, Kinta (08/01/2026).
Xefe eskola nee hatete, estudante iha EBF nee hamutuk 2079, maibe nee tinan kotuk nian bá tinan ida nee nian seidauk sura hamutuk. Husi numeru nee kada sala tau estudante 50 ba leten. Total sala iha eskola nee hamutuk 12, no eskola nee fahe bá terseiru turnu.
Nia hatutan, fasilidade neebe menus iha eskola neemak hanesan meza ho kadeira. Problema sira nee husi parte edukasaun mai foti ona dadus, neebe eskola hein deit.
Nunee mos inan Estudante Paulina Carvalho afirma, iha Segunda nee estudante sira hahu tama ona bá eskola, maibe too mai iha nee profesor sira haruka fila dehan Kinta nee mak mai hodi haree labarik sira nia naran no simu farda bá estudante sira neebe mak hatama ona osan.
“Ohin ami mai fali hodi haree labarik sira nia naran no simu farda foun, depois Segunda (12/01/2026) mai mak labarik sira mai tama eskola. Nee ohin profesor sira mak avizu hela. Loron Kinta too Sabadu nee Sira mai haree deit naran no simu farda, Segunda mak sira tama los ona,” dehan nia.
Nia hatutan, eskola bazica iha Tasi-Tolu nee mak ida nee deit ona, neebe hakarak lakohi komunidade neebe hela iha area Tasi-Tolu too Danau, sira nia oan tama hotu iha nee. Ba Inan aman sira neebe iha transporte mak bá buka fali eskola sira seluk iha laran neeba, maibe bá sira neebe laiha transporte nee mai hotu iha nee.
Reportajen: Domingas Gomes
