DILI, STLTIMORLESTE.com – Timor-Leste (TL) kondena maka’as atake forsa Houthi nian hasoru Reinu Arábia Saudita, inklui atake ho misil iha Aeroportu Internasionál Liurai Khalid, Riade, iha loron 10 no 11 fulan Outubru 2026.
Prezidente Repúblika, José Ramos-Horta liuhosi mensajen iha Tersa-feira, 13/10/2026, hatete katak hahalok sira-ne’e viola direitu internasionál no prinsípiu sira iha Karta Nasoins Unidas.
Nia hatete katak, atake deliberadu hasoru infraestrutura sivíl, ne’ebé kauza ema mate no atus resin kanek, mak hahalok ne’ebé tenke kondena.
Atake sira-ne’e mós fó perigu ba populasaun sivíl, ameasa aviasaun sivíl internasionál no viola prinsípiu fundamentál sira direitu umanitáriu internasionál.
Timor-Leste manifesta solidariedade ho Governu no povu Arábia Saudita, hodi defende soberania, independénsia, integridade territoriál no seguransa Reinu nian.
Timor-Leste hato’o kondolénsia kle’an ba família sira ne’ebé lakon membru família no dezeja rekuperasaun kompleta ba ema hotu ne’ebé kanek.
Prezidente Ramos-Horta deklara katak, atake sira-ne’e la’ós de’it atake hasoru nasaun soberanu ida, maibé mós dezafiu ba orden internasionál no ameasa ba pás no estabilidade iha Golfu no Médiu Oriente.
“Laiha objetivu polítiku ida mak bele justifika atake sira ne’ebé fó perigu ba ema nia vida no infraestrutura sivíl. Forsa Houthi sira tenke hapara kedas atake ilísitu sira-ne’e no respeita obrigasaun tuir direitu internasionál,” deklara Prezidente Repúblika no Prémiu Nobel Pás, José Ramos-Horta.
Timor-Leste husu ba komunidade internasionál, inklui Konsellu Seguransa Nasoins Unidas, atu hatán maka’as no klaru ba atake sira-ne’e, hodi defende prinsípiu sira iha Karta Nasoins Unidas.
Timor-Leste mós ezije atu ema responsavel sira hapara atake sira seluk, hodi prevene vítima sivíl adisionál no impede konflitu atu la habelar ba rejiaun tomak.
Timor-Leste reafirma katak respeitu ba soberania Estadu sira, protesaun ba populasaun sivíl no kumprimentu ba direitu internasionál mak fundamentu importante ba pás no seguransa internasionál.
Timor-Leste ezorta parte hotu-hotu atu ezerse restrisaun, evita eskalada violénsia no buka solusaun pasífika ba konflitu liuhosi diálogu no diplomasia.
(eme)
