DILI, STLTIMORLESTE.com – Prezidente Repúblika (PR), José Ramos-Horta simu Embaixadora Kuba ba Timor-Leste, Alina Aldama, hodi hametin koperasaun diplomátika, edukasaun no saúde entre nasaun rua.
Iha enkontru ne’ebé hala’o iha Palásiu Prezidensiál Nicolau Lobato, Bairru Pité, iha tersa-feira (13/10/2026), Embaixadora Alina Aldama hato’o informasaun ne’e ba jornalista sira.
“Senti ondra boot mai hasoru sua Exelensia Prezidente Republika hodi hametin lasu amizade, liu liu iha area edukasaun,” katak Embaixadora.
Iha sorumutu ne’e, Embaixadora Alina Aldama aprezenta projetu kolaborasaun foun ne’ebé foka ba hametin edukasaun primária, bázika no sekundária iha Timor-Leste.
Enbaixadora Kuba nian hato’o agradesimentu ba Prezidente Ramos-Horta tanba nia simu no fó tempu ba enkontru ne’e.
Nia mós afirma katak, Governu Kuba kontinua komprometidu atu apoia dezenvolvimentu povu Timoroan, liuliu iha área edukasaun no protesaun ba labarik sira.
Embaixadora Aldama destaka Prezidente Ramos-Horta nia kompromisu atu apoia komunidade vulnerável sira, liuliu labarik sira, no agradese ba nia simu ho laran-metin proposta edukativa ne’e.
Sorumutu ne’e mós sai oportunidade atu hametin solidariedade no relasaun diplomátika entre Timor-Leste no Kuba.
Embaixadora Aldama hato’o agradesimentu ba Prezidente Ramos-Horta tanba nia haruka karta kongratulasaun ba Prezidente Kuba, Miguel Díaz-Canel, hodi komemora loron istóriku Kuba nian, 10 Outubru.
Loron ne’e importante iha istória Kuba nian, tanba liga ho luta ba independénsia no abolisaun eskravatura.
Aleinde edukasaun, enkontru ne’e mós reafirma koperasaun istórika iha área saúde entre Timor-Leste no Kuba.
Embaixadora Alina Aldama asegura katak, brigada médika Kuba nian sei kontinua servisu iha nivel komunidade, hamutuk ho Ministériu Saúde, atu apoia sistema saúde Timor-Leste.
Nia mós destaka inisiativa ne’ebé lori espesialista médiku Kuba nian ba Illa Atauro ba dala uluk, hodi fó asesu ba kuidadu saúde integradu ba komunidade ne’ebé hela iha área dook.
(eme)
