DILI, STLTIMORLESTE.com – Prezidente Republika (PR), Jose Ramos Horta sempre loke Galeri ou Salaun Xina ba ema hotu neebe presiza halao atividade no vizita fatin refere.
Tuir observasaun neebe STL iha loron Segunda nee (12/01/2025) haree odamatan Palasiu Prezidensial sempre nakloke ba publiku ba ema neebe hakarak vizita fatin Galeri salaun Xina, fatin nee nakonu ho imajen luta nain sira nia nomos livru sira.
Galeri Salaun Xina kada loron sempre iha vizita husi sidadaun rai laran liu-liu estudante sira nomos bainaka sira husi nasaun seluk bainhira remata halo enkontru sempre ba vizita fatin Galeri memori iha salaun Xina neebe nakonu ho livru, imajen husi saudozu luta nain sira inklui mos tais ho kores husi munisipiu hotu nia.
Aleinde nee salaun Xina ou Galeri memoria nee laos vizita deit maibe NGO ka Governu sira halao atividade mos realiza iha fatin refere, no iha salaun Xina iha fatin enkontru nomos iha kotuk iha mos salaun Papa Sua santidade Papa Francisco nia.
Nunee mos vizitante Marejina Amaral sublima katak, iha nasaun seluk Palasiu Prezidensial ema neebe merese tama foin bele b, maibe iha Timor Leste, Prezidente Republika Jose Ramos Horta dehan palasiu ba povu, entaun halo ema hotu tantu estudante no ema baibain sempre tama palasiu laran, ida nee ezemplu neebe diak.
Nia hatete, kontente tanba bele tama Palasiu Prezidensial laran hodi haree imajen neebe furak nomos bele haree mos fatin Papa Francisco nia.
“sente kontente tanba bele tama palasiu laran, ami tama ba palasiu laran tanba iha atividade ida iha salaun Xina nee, entaun hotu ami mos aproveita foto iha fatin nee,” katak nia.
Muzmu nunee, Prezidente Republika Jose Ramos Horta hatete, fatin nee ba joven sira vizita, nomos balun mos halao atividade iha fatin refere.
“Fatin nee imi hatene nee salaun Xina iha kotuk nee salaun Papa Francisco ondra no omenajen ba Papa Francisco, bainhira hau simu todan nuudar Prezidente ami buka halo fatin nee hanesan galeria boot ida sentru de konsentru no enkontru,” dehan PR Horta.
Prezidente dehan, hadia fatin salaun Xina nee laos kompanhia ruma mak ba hadia fatin nee, maibe Prezidente ho ekipa mak hadia rasik.
“Hau ho staf Prezidensial halo iha nee, senhora Natalia Cracalao iha nee hau nia Xefe Gabinete Xefe kaza Sivil iha nee ami mak fo liman lao ba mai iha laran nee halo dekorasaun tau sasan buka buat hotu hotu mak halo galeria ida nee para simu ita boot sira,” dehan PR Horta.
Xefe Estadu dehan, Galeri Palasiu Prezidensial sempre simu ema hotu, neebe husu atu halao atividade oin oin iha fatin refere, no atividade barak ona mak realiza iha Galeri Palasiu Prezidensial.
(eme)
