AMBENO, STLTIMORLESTE.com – Hadi’a kualidade moris komunidade no dezenvolve servisu públiku sai hanesan objetivu prinsipál husi kooperasaun entre Cuba no Rejiaun Administrativa Espesiál Oecusse-Ambeno (RAEOA). Ho objetivu ne’e, Embaixadora Cuba iha Timor-Leste, Alina Aldama, halo vizita no enkontru ho Prezidente Autoridade RAEOA, Regio da Cruz Salu, atu avalia programa kooperasaun ne’ebé eziste no identifika oportunidade foun ba futuru.
Enkontru ne’e hala’o iha salaun Gabinete Prezidente Autoridade, Oebau, Oecusse, Sesta-feira (06/11/2026), ho diskusaun ne’ebé foka ba revizaun projetu kooperasaun no posibilidade atu dezenvolve área espesialidade foun, liuhusi partilla koñesimentu, esperiénsia no rekursu umanu profisionál husi Cuba.
Alina Aldama, iha nia deklarasaun ba jornalista sira hafoin enkontru, hato’o agradese ba órgaun komunikasaun sira ne’ebé kontinua akompaña no fó kobertura ba atividade Embaixada Cuba iha Timor-Leste, liuliu durante vizita ba Oecusse.
Nia mós hato’o apresiasaun ba Prezidente Autoridade RAEOA, Regio da Cruz Salu, tanba disponibilidade no sempre hatudu hodi simu vizita no diskute oportunidade kooperasaun.
Embaixadora ne’e esplika katak, vizita ne’e iha objetivu atu halo revizaun ba projetu kooperasaun sira ne’ebé Cuba oferese ona, no haree oportunidade atu hadi’a implementasaun projetu hirak-ne’e, inklui dezenvolve kooperasaun iha área seluk.
“Asuntu prinsipál mak atu hadi’a kualidade servisu sira ne’ebé ami oferese. Liuhusi Prezidente Autoridade Rejiaun, ami sei halo análize atu identifika espesialidade seluk ne’ebé bele sai oportunidade ba kooperasaun,” Alina Aldama afirma.
Nia subliña katak, Cuba prontu atu kontinua fahe koñesimentu, esperiénsia no profisionál sira ho Timor-Leste, hodi kontribui ba dezenvolvimentu kapasidade no hadi’a servisu iha área sira ne’ebé presiza apoiu.
Iha perspetiva futuru, Embaixadora Cuba hakarak programa kooperasaun sira bele lori benefísiu direta ba populasaun RAEOA, liuliu iha hadi’a kualidade moris komunidade no fó oportunidade ba labarik Timoroan sira atu hetan benefísiu husi projetu dezenvolvimentu.
Nia mós manifesta esperansa atu Oecusse bele sai hanesan fatin implementasaun projetu-pilotu, ne’ebé rezultadu pozitivu bele uza nu’udar ezemplu ba munisípiu sira seluk iha Timor-Leste.
Alina Aldama konsidera katak rezultadu husi kooperasaun ne’e la’ós de’it atu fó benefísiu ba Oecusse, maibé bele mós sai kontribuisaun ba dezenvolvimentu nasionál no, iha futuru, ba rejiaun Sudeste Aziátiku, ne’ebé Timor-Leste partisipa nu’udar membru ASEAN.
Ho nune’e, revizaun ba projetu kooperasaun Cuba–RAEOA ne’e sai hanesan oportunidade atu identifika nesesidade foun, hametin partilla koñesimentu no buka solusaun ne’ebé bele fó impaktu pozitivu ba komunidade lokal.
Maski nune’e, programa espesífiku, área kooperasaun ne’ebé sei hili no kalendáriu implementasaun sei presiza klarifikasaun husi parte rua.
PA-RAEOA Hametin Kooperasaun ho Kuba
Iha oportunidade nee Prezidente Autoridade Rejiaun Administrativa Espesiál Oecusse-Ambeno (PA-RAEOA), Regio da Cruz Salu dehan Kooperasaun entre Timor-Leste no Kuba sei tama ba faze implementasaun foun, ho fó atensaun ba dezenvolvimentu setór saúde, agrikultura, edukasaun no desportu, inklui projetu produsaun iogurte probiótiku atu kontribui ba redusaun stunting no malnutrisaun iha Timor-Leste.
Prezidente Autoridade Rejiaun Administrativa Espesiál Oecusse-Ambeno (PA-RAEOA), Regio da Cruz Salu, afirma katak vizita Embaixadora Kuba ba Oecusse nu’udar oportunidade importante atu avalia kualidade apoiu no servisu saúde ne’ebé Governu Kuba fornese ba Timor-Leste, no hametin tan relasaun kooperasaun entre nasaun rua.
Regio da Cruz Salu haktuir katak, relasaun kooperasaun Timor-Leste no Kuba hahú ona durante períodu luta ba independénsia, bainhira Governu Kuba fó apoiu ba povu Timor-Leste. Kooperasaun ne’e kontinua dezenvolve to’o agora, liuhusi programa kapasitasaun no apoiu tékniku iha área importante sira.
Nia esplika katak, kooperasaun espesífika ida hahú iha tinan 2015, ho apoiu ba kapasitasaun iha área agrikultura no teknolojia agríkola, inklui implementasaun programa agrikultura urbana.
“Timor-Leste no Kuba iha kooperasaun ne’ebé naruk ona, liuliu durante ita nia luta ba independénsia. Governu Kuba apoia ita, no kooperasaun ne’e kontinua to’o ohin loron,” Regio da Cruz Salu dehan.
Iha área kooperasaun internasionál, Prezidente PA-RAEOA hateten katak mudansa iha enquadramentu legál no estrutura institusionál sai baze ida atu kontinua hametin relasaun kooperasaun entre autoridade sira iha Timor-Leste no Governu Kuba.
Nia mós refere katak, iha ona diskusaun no interasaun ho delegasaun Kuba iha Ministériu Saúde, inklui programa kooperasaun ne’ebé envolve munisípiu sira no RAEOA, ho área prioridade hanesan saúde, edukasaun, turizmu no desportu.
Iha sorin seluk, kooperasaun iha área desportu mós sai parte importante husi ajenda dezenvolvimentu ne’e. Regio da Cruz Salu afirma katak Timor-Leste sei aproveita esperiénsia no kapasidade téknika husi treinadór Kuba atu dezenvolve atleta nasionál, liuliu iha modalidade boxe ka tinju.
Nia hateten katak, treinadór sira hosi Kuba iha kontribuisaun ba preparasaun atleta Timor-Leste nian, ne’ebé konsege hetan medalha bronze iha kompetisaun Asian Games iha Tailándia, tuir deklarasaun Prezidente PA-RAEOA.
Tanba ne’e, Governu Kuba hatudu prontidaun atu kontinua fó apoiu ba joven atleta Timor-Leste sira, liuliu ne’ebé rejista iha SDTL, atu dezenvolve modalidade tinju no prepara sira ba kompetisaun desportiva iha nivel lokál, rejionál no nasionál.
Iogurte Probiótiku Ba Reduz Stunting
Entre projetu sira ne’ebé sei tama ba faze implementasaun, produsaun iogurte probiótiku sai ida husi inisiativa ne’ebé hetan atensaun espesiál, tanba iha ligasaun direta ho nutrisaun no saúde labarik sira.
Regio da Cruz Salu informa katak PA-RAEOA konkorda ona atu avansa projetu kooperasaun ho kompania Sociedade Anónima (SA) ida ne’ebé produz iogurte probiótiku, ho objetivu atu kontribui ba redusaun stunting no malnutrisaun.
Tuir nia deklarasaun, projetu ne’e mós sei buka dalan atu produtu iogurte probiótiku bele kompleta menu merenda eskolar, hodi aumenta asesu labarik sira ba ai-han ne’ebé iha valor nutrisionál.
Nia hein katak, projetu ne’e bele lansa molok tinan 2026 remata, ka antes fulan Dezembru, nu’udar parte ida husi kompromisu kooperasaun entre PA-RAEOA no parseiru Kuba.
Inisiativa ne’e hatudu katak kooperasaun internasionál la’ós de’it kona-ba relasaun diplomátika, maibé mós bele transforma sai programa konkretu ne’ebé fó benefísiu ba komunidade, liuliu iha área saúde, nutrisaun, edukasaun no dezenvolvimentu kapasidade rekursu umanu.
(jos)
