DÍLI, STLTIMORLESTE.com – Prezidente Komite 12 Novembru, Gregorio Saldanha, apela ba juventude atu respeita lei, moral no étika hodi hametin demokrasia iha Timor-Leste.
Gregorio Saldanha dehan katak, komemorasaun Loron Juventude, 12 Novembru, sai oportunidade importante atu reflete fila-fali ba luta no sakrifísiu juventude nian durante prosesu libertasaun nasionál.
Nia hateten katak, Timor-Leste ohin loron enfrenta dezafiu oioin, hahú husi problema governasaun, situasaun sosial to’o hahalok juventude nian.
Tuir Saldanha, demokrasia fó direitu no liberdade ba sidadaun hotu, maibé liberdade ne’e tenke hala’o ho responsabilidade no respeita lei.
“Ema balun uza liberdade ne’e hodi viola lei no la respeita ema seluk, liuliu iha média sosiál,” dehan Nia ba STL iha Balide, Sesta (06/11/2026).
Nia subliña katak, autoridade kompetente sira iha responsabilidade atu orienta sosiedade, promove respeitu malu no hametin valor moral no étika iha komunidade.
Saldanha esplika katak, independénsia Timor-Leste la hetan ho dalan fasil, maibé liuhusi sakrifísiu boot, inklui vida hosi joven no patriota barak.
Tanba ne’e, nia husu ba jerasaun ohin atu valoriza istória luta libertasaun nasionál no respeita sakrifísiu ne’ebé erói sira halo ba nasaun.
Nia mós apela ba instituisaun edukasaun, autoridade suku no família sira atu kontinua fó edukasaun sivika, liuliu kona-ba moral, étika, respeitu malu no responsabilidade sosial.
Aleinde ne’e, nia konsidera katak problema sosial hanesan konsumu droga no hahalok ne’ebé la respeita ema seluk presiza atensaun hosi instituisaun relevante no sosiedade tomak.
Saldanha hein katak komemorasaun 12 Novembru bele sai momentu ba povu atu avalia hahalok iha tempu pasadu no prezente, hodi prepara futuru ne’ebé di’ak ba jerasaun tuirmai.
“Timor-Leste ne’e ita hotu nian. Sira ne’ebé ukun presiza hadi’a servisu, no sira ne’ebé seidauk ukun presiza prepara an ba futuru nasaun nian,” nia afirma.
(dom)
