DILI, STLTIMORLESTE.com – Tinan nee Ministeriu Edukasaun (ME) taka klase paralelu ualu (8) iha munisípiu lima, ho razaun tanba la prienxe rekezitus husi ministériu refere.
Informa Diretor Nasional Ensinu Sekundariu iha ME, Benjamin Gomes da Cruz Fernandes ba jornalista STL, Kuarta nee (14/01/2026).
“Klase paralelu, eskola ida Olokasa iha Munisipiu Vikeke ninia klase mak paralelu, razaun taka tanba la prienxe kriteriu, primeiru estudantes laiha, profesores permanente mos laiha, naran bolu ema mai hanorin deit, kualidade ensinu nee atu tau iha neebe, ho ida nee mak estadu taka, nunee estudantes sira nee ba konsentra iha eskola sentru hodi simu materia neebe kompletu husi profesores, atu nunee kualidade ensinu nee bele iha, se lae mak akaba deit mos kualidade laiha,” nia dehan.
Benjamin hatutan, inan aman estudantes kestiona nee, tanba ema ruma mak ba pengaru ka iha interese privadu balun iha laran, entaun hakarak halo buat sira hanesan nee, maibe realidade ema barak nia oan eskola iha sentru laiha problema. Ema sai profesor mak bele hanorin, atu nunee uza metodolojia hanorin nee, ida nee naran ba dada ema ba hanorin estudantes iha nivel sekundariu ninia, nee estadu tenke taka.
“Ami taka iha klase paralelu ualu (8), nee mak ida iha Munisipiu Vikeke, tolu iha Baukau, ida iha Ainaro, rua iha Manufahi, ida iha Ermera, klase paralelu ualu (8) neebe ME taka nee, tanba la prienxe rekezitus, nee mak hanesan haree ba profesores, edifisiu neebe uza ba hanorin balun okupa ensinu baziku nian fatin, balun loke tiha profesor laiha, naran ba dada ema hanorin deit,” tenik nia.
Nia afirma, hahu iha loron 1 fulan ida nee sira labele simu tan estudantes foun, estudantes neebe mak iha hela klase 2 nee, ida nee lao, maibe muda ba iha sentru, estudantes foun nee bandu simu ona.
(jac)
