DILI, STLTIMORLESTE.com – Reflesaun ohin loron koalia kona-ba Maromak konvida ema atu rona Nia liafuan sira no tuir Nia.
Lia hirak nee Padre Richardo Pasang SVD ba jornalista STL liu husi refleksaun ba loron Kuarta (14/01/2025) hatete, Maromak konvida ema hotu atu tuir Nia no rona Maromak nia ukun fuan sira.
“Prontu atu rona Maromak nia lian, Leitura Santa ohin nian 1 Samuel 3:1-10.19-20 no Markus 1:29-39, konvida ita atu reflete kona-ba vontade atu rona Maromak nia lian no tuir Nia,” dehan Padre Richardo.
Padre dehan, Samuel nia Vontade, Samuel neebe sei joven, sai Maromak nia atan neebe Eli tau matan ba nia. Maromak bolu Samuel, maibe nia la rekonhese kedas Maromak nia lian.
“Depois Eli esplika deit, Samuel hatan koalia, oh Nai, ita boot nia atan rona hela. Samuel nia vontade atu rona no tuir Maromak halo nia sai profeta boot iha Israel,” dehan Padre.
Padre dehan, Jesus Kurador ba ema nia moras no nain ba buat hotu, tanba nee nafatin tau konfiansa iha Kristu.
“Jesus kura Simon nia banin feto neebe isin manas, ho mos ema barak neebe moras no diabu domina. Jesus hatudu ninia mizerikordia no kbiit, no konvida ita atu tuir Nia no sai ninia sasin,” katak Padre Richardo.
“Enkomenda ba ami, ita simu bolu atu iha vontade hanesan Samuel, atu rona Maromak nia lian no tuir Nia. Ita mos simu bolu atu sai sasin Jesus nian, hodi habelar ninia domin no kbiit ba ema seluk,” katak nia.
Bibi atan kreda katolika nee dehan, nuudar sarani nafatin rona Maromak nia liafuan sira, nunee bele sai sasin no habelar domin ba ema seluk.
(eme)
