BAUKAU, STLTIMORLESTE.com – Prezidente Konselhu Munisipal Kombatentes Libertasaun Nasional (KMKLN) Baukau, Cornelio Gama “L7” husu veteranus sira respeita estrutura servisu neebe Governu estabelese ona iha kada Munisipiu.
L7 hateten, kona-ba lista edital rejistu tinan 2009 nian neebe kombatentes Rui dos Santos “Mauserik” la satisfas ho atribuisaun husi Estadu Timor Leste, tanba hetan 3a7, nunee kombatentes refere submete ona nia karta kontestasaun hein prepara ba anunsiu husi Konselhu Kombatentes Libertasaun Nasional. Maibe iha parte seluk ba asuntu refere pesoal ida lori kestaun nee aprezenta ba Primeiru Ministru (PM) Kay Rala Xanana Gusmão.
“Ita tenke evita tanba iha dalan eskada por eskada mak bele too iha Prezidente no Primeiru Ministru, labele hakat liu organizasaun nasaun nian,” hateten L7 ba jornalista sira iha nia knaar fatin Vila Antiga Baukau, Kinta (15/01/2026).
Nia sublina, Instituisaun Estadu nian hanesan Konselhu Munisipal Kombatentes Libertasaun Nasional neebe estabelese iha kada Munisipiu atu atende asuntu kombatentes no veteranus sira nia problema, tanba nee husu kombatentes no veteranus neebe karik bainhira iha problema aprezenta liu husi Konselhu Munisipal Kombatentes Libertasaun Nasional hafoin relata ba Nasional hodi solusiona.
Tanba nee, asaun neebe pesoal ida aprezenta asuntu kombatentes Rui dos Santos Mauserik nia problema ba Primeiru Ministru, hanesan Prezidente KMKLN Baukau la konkorda ho reasaun refere, tanba la liu husi eskada no laiha konsiderasaun.
“Labele inisiativa mal kontroladu ba mak ami la konkorda, hateten ba irman Madalena kualker Konselhu Veteranus iha Baukau iha tenke liu husi iha nee, labele hakat liu, hakat liu hau Prezidente Veteranus hau hapus imi nian, tanba sa, tanba tau iha nee atu haree imi nia problema mais imi la konsidera oinsa ami konsidera imi,” L7 akresenta.
Mezmu nunee, maibe Prezidente Konselhu Munisipal Kombatentes Libertasaun Nasional Baukau nee husu ba kombatentes Rui dos Santos Mauserik atu pansiensia hein rezultadu husi nasional ba karta kontestasaun neebe submete ona.
Entretantu Kombatentes Rui dos Santos “Mauserik” nuudar kundotor ba kareta Violeta, Raios de Golgota no Tala Indah neebe katak iha tempu okupasaun Indonezia tula hahan ba Forsa FALINTIL no tula jovem halo demostrasaun hasoru invazor Indonezia iha Baukau Vila. Asaun demostrasaun rezultadu kareta Violeta rahun no Mauserik hetan kanek iha parte ain tanba sona inklui kanek mos iha parte ulun tanba hetan baku husi militar Indonezia too kastigu tan nia iha Dan Sektor A Ladun Baukau.
(tom)
