BALI, STLTIMORLESTE.com – Sekretariu Estadu Komunikasaun Sosial (SEKOMS), Expedito Loro Dias Ximenes lori reprezenta media hamutuk sanulu (10) halao media tour iha Bali, hodi haree besik servisu redasaun instituisaun Bintang Radiu dan Televisi (BRTV) no Radiu Republika Indonezia (RRI) Denpasar.
Media sanulu neebe involve iha media tour nee mak hanesan Radio Televizaun Timor Leste (RTTL), Ajensia Tatoli, Suara Timor Lorosae Corporation (STL,CORP), GMNTV, Timor Post, Diariu Jornal Independente, DILI Post, SMNEWS, SAPNEWS, VIP TV.
Liu husi enkontru Xefe redasaun Bali TV, Made Sueca kontente ho vizita media husi Timor Leste halo media tour iha Bali Tv.
Nia dehan, papel media nian iha era ida agora importante tebes, tanba liu husi publikasaun sira bele kontribui muda sosiedade nia hanoin liu-liu iha Bali nomos iha fatin seluk.
“Bali la iha rasismu ba relijiaun no asuntu saida deit,” hatete Xefe redasaun Bali TV, Made Sueca liu husi diskusaun iha Bintang Radio dan Televisi, Bali, Kinta (15/01/2026).
Nia hatutan, oras nee mosu kompetisaun entre meda sira liu husi publikasaun iha TV, online nomos Radiu, tan nee politika redasaun tenke koloka asuntu entre online no jornal labele hanesan nee, nunee bele dada leitor sira nia atensaun ba kualker notisia.
“Redasaun tenke koloka asuntu ba online ho jornal labele hanesan, asuntu bele hanesan maibe anglu labele hanesan. Kona-ba independensia editorial, ita bele iha akordu ho Governu iha publisidade, maibe kritiku nee tenke lao nafatin, importante mak halo diferensa entre advetorial ho notisia, no importante mak fo benefisiu ba sosiedade,” dehan nia.
Sorin seluk, Xefe Instituisaun Radiufuzaun publika Radiu Republika Indonesia (RRI, Denpasar), Taufan Pamungkas Mahendra Jaya hatoo benvindu ba Sekretariu Estadu Komunikasaun Sosial no reprezenta Instituisaun media 10 neebe halao vizita ba iha Agensia Radio Republika Indonezia (LPP RRI) iha Denpasar.
Nia dehan, vizita nee hanesan onra no ksolok ida tanba bele simu vizita amizade ida nee ba iha Bali, ilha ida neebe tane aas valor sira abertura nian, dialogu no armonia entre nasaun sira.
“Ami interpreta vizita nee nuudar manifestasaun ida husi relasaun forte entre Indonezia no Timor Leste, partikularmente iha area komunikasaun no radiodifuzaun nian. Iha era atual transformasaun dijital nian,” afirma Xefe Instituisaun Radiufuzaun publika Radiu Republik Indonesia (RRI), Taufan Pamungkas Mahendra Jaya.
Nia dehan, ohin loron papel midia publiku nian sai estratejiku liu tanba hanesan ponte informasaun nian, kolia kona ba asuntu sosial ida, no instrumentu diplomatiku ida neebe harii komprensaun no konfiansa entre nasaun sira.
“Liu husi enkontru ida nee, ami hein atu fahe esperiensia sira no pratika sira neebe diak liu, no esplora oportunidade sira ba kolaborasaun neebe fo benefísiu ba malu,” dehan nia.
Nia mos esplika, iha jestaun transmisaun publika, dezenvolvimentu konteudu no utilizasaun plataforma dijital sira hodi serve publiku ho inkluzivu liutan.
“Ikus liu, ami hein katak vizita ida-nee sei fo benefísiu, hametin ami-nia amizade, no sai nuudar inisiu ba kolaborasaun ida neebe sustentavel entre Ministeriu Komunikasaun Timor Leste no RRI LPP.
LPP RRI Denpasar iha area koordenasaun transmisaun nian neebe kobre provinsia sira Bali no Nusa Tenggara Osidental. Nuudar plataforma midia terrestre no dijital multi-plataforma, Ami nia kobertura terrestre maka 95%, ho estasaun transmisaun haat: Denpasar, RRI Mataran, RRI Singaraja, no Estasaun Produsaun Bima.
Entretantu Sekretariu Estadu Komunikasaun Sosial (SEKOMS), Expedito Loro Dias Ximenes afirma, objetivu husi midia tour neebe halao iha Bali, Indonezia nee mak atu hare besik dezenvolvimentu Radiu Republika Indonezia iha area transformasaun dijital nian.
“Tanba saida mak ami hili Bali nee, tanba Bali konhesidu ho sitiu turistiku no kultura neebe konesidu tebes,” dehan SEKOMS, Expedito Loro Dias Ximenes.
Nia dehan, vizita iha Radiu Republika Indonezia iha Denpasar Bali nee atu atu hatene diak liu Dezenvolvimentu neebe radiu nee iha, no ami hare katak transformasaun dijital nee iha Radiu nee oras nee avansadu tebes iha nee.
Governante nee mos la haluha lori reprezenta midia sira neebe mai vizita Rádiu Republika Indonezia (RRI), hakarak hato obrigadu barak ba Xefe Instituisaun Radiufuzaun Publika Radiu Republika Indonezia ho funsionariu tomak tanba bele simu delegasaun iha fatin nee ho diak.
“Ami la espera tanba bele simu ami diak hanesan nee, tanba ami nia vizita iha Bali nee hanesan midia tour, no liu husi enkontru informal nee bele hametin servisu hamutuk neebe metin liu tan iha tempu oin,” dehan nia.
RRI Denpasar ofisialmente hahu halo transmisaun iha loron 9 fulan Novembru tinan 1950. Objetivu husi nia estabelesimentu mak atu fornese informasaun ba povu Bali liu husi transmisaun radiu, no estasaun ida-nee sai hanesan instrumentu ida neebe importante tebes atu habelar notisia.
Entretantu iha vizita ba Bintang Radiu dan Televisi (BRTV), Sekretariu Estadu Komunikasaun Sosial, Expedito Loro Dias Ximenes, dehan ho dezenvolvimentu teknolojia ohin loron jornal tun ba beibeik, maibe jornal eziste nafatin iha sosiedade.
“Atu hatete deit katak kondisaun iha-nee hanesan mos iha Timor-Leste, maibe oinsa mak espiritu iha profisaun hanesan troka ideia tanba universal. Ami buka esperiensia sira hodi hariku ami-nia espriensia,” hatete Sekretariu Estadu Komunikasaun Sosial, Expedito Loro Dias Ximenes, koalia liu husi diskusaun iha Bintang Radio dan Televisi, Bali.
(alb)
