AMBENO, STLTIMORLESTE.com – Liu husi omilia, Amu Vigariu Parokia Nossa Senhora do Rosario Oecusse, Pe. Florindo de Jesus lori sarani sira nia konsentrasaun tomak iha loron Domingu (18/01/2026) ho tema, Maromak Nia Bibi Oan, Neebe Kasu Mundu Nia Salan, fokus ba João Batista nia aan hodi aprende atu halakon buat ida bolu dehan buka popularitas, buka oin no ambisaun.
“Ita nia konsentrasaun tomak iha Domingu ida ohin, ita fokus tomak ba João Batista nia aan hodi aprende husi nia ezemplu. Buat ida neebe João Batista hakarak hanorin ba ita iha Domingu ida ohin mak nee, hanorin ita atu halakon husi ita nia aan buat ida bolu dehan buka popularitas, buka oin, ambisaun,” dehan Amu Vigariu Parokia Nossa Senhora do Rosario Oecusse, Pe. Florindo de Jesus liu husi ninia omilia, bainhira prezide misa iha Igreja Tuan Santo Antonio Oecusse, Domingu (18/01/2026).
Nia dehan, João, maski nia mak ema ida neebe prepara dalan ba Maksoin nia hiit aan mai, maibe nia nunka gava aan ho knaar nee, nia nunka loko aan ho knaar nee, atate saserdote no levi sira haruka ba husu nia katak nia messsias ka laos. João fo sasin loloos katak nia laos messias, nia mak lian ida neebe hakilar iha rai fuik maran ba ema hot-hotu atu prepara aan hodi hein messias neebe sei hiit aan mai.
“João haraik liu iha ema hotu nia oin, hodi deklara katak laos mak hau maibe sei iha ida neebe tuir mai. Ita mak hanesan nee karik, parese foti aan sae too lalaehan, hateke ema seluk la hetan, simu knaar nudar diretor maski laos ho diploma profisionalizmu, ho deit ijajah SMA, maibe foti aan liu tiha ema sira prefisionalizmu, foti aan liu tiha ema sira mai ho Diploma S2, S3, koalia ASBUN alias asal bunyi tiada nyaring,” haktuir nia.
Nia hatutan, João hanesan simbol ba ema se se deit atu aprende husi nia hahalok oin sa hatene haraik aan, maski nia mos lider ida neebe luta nain, tuba rai metin, too mate mean, tesi nia kakorok, maibe nia defende nafatin katak laos nia mak boot liu maibe Jesus mak boot liu nia.
Maski mundu oferese poder, oferese popularidade, oferese rikusoin maibe nia la tergoda ho buat sira nee, nia la monu ho buat sira hanesan buka poder, buka popular, buka riku soin maibe nia buka manan naran neebe hakerek iha lalehan.
“João nia atitude diferente ho ita balun neebe sempre aproveita oportunidad,e hodi hetan lukru, ou bahasa dehan memanfaatkan setiap kesempatan untuk mendapat kredit. Ohin, ita tama ona ba iha II Domingu ka Domingu ba dala II Tempo bai-bain Ano A. Semana kotuk evanjelhu koalia kona ba João sarani Jesus iha Mota Jordão, Evanjelhu ohin João apresenta mai ita kona-ba identidade Jesus nian nuudar Maromak Oan lo-loos. João ho Jesus primu irmão, maibe João foin hasoru malu ho Jesus iha tempo batismo. Ohin hasoru malu ba dala rua nian, no João aprezenta ba nia eskolante sira neebe nia hanorin daudaun katak Jesus mak “Maromak Oan neebe sei kasu mundu nia salan”. João Batista dehan ba sira, “Nia mak ida neebe hau dehan ona katak, depois de hau, sei mai ida neebe boot liu hau, hau la soi atu kore nia sandalis talin,” afirma Amu.
João rasik rekonhese nia aan katak nia nunka konhese se mak Jesus, maibe João fo sasin loloos katak Jesus mak Maromak nia Bibi Oan neebe kasu mundo nia salan, wainhira João rasik haree ho matan espíritu santu tun mai husi lalehan hanesan falur ida, mai tur iha Nia leten, nunee João fo sasin lo-loos katak Nia mak ida neebe Maromak hili.
João Batista mak Maromak nia atan neebe Profeta Isaias fo sai iha Primeira Leitura ohin dehan, “Ó hau atan, husi ó Hau sei hatudu hau kbiit”, Hau sei halo ó hanesan naroman ba nasaun hotu-hotu, atu hau nia maksoin too ba rai hotu-hotu”.
Maromak hili João dezde João sei iha nia inan nia knotak, Maromak prepara ona João hodi prepara dalan ba ida neebe sei mai, ida neebe iha kbiit no poder makaas liu nia. Nunee, husi João nia lia sasin, maksoin too ba rai hotu-hotu no ema hotu konhese Maromak nia maksoin.
Ita husu ba ita ida-idak nia aan, será que ita konhese didiak ona Jesus nee ka lae? Los duni, ita hanesan sarani, liu-liu ita hanesan ema Católico, desde moris mai, ita boot kedas ona hamutuk ho Maromak nia liafuan, ita rona bebeik, ita reflete bebeik kona ba Jesus nia moris. Maibe, ohin Maromak futar liafuan hakarak husu ida nee ba ita ema fiar nain sira, ema sarani, ema Católico sira, será ita fiar tebes duni katak Jesus nee mak Maromak nia bibi oan be kasu mundo nia sala eh lae?
Domingu ida ohin, uma kreda konvida ita sarani sira atu fo tempo hodi reflete iha ita nia hanoin no ita nia moris, serake ita fiar lo-loos ona, ita fiar tebes duni iha hostia Consagrada neebe molok ita simu, nailulik sira hatudu ba ita katak “nee hae Maromak bibi oan be kasu mundu salan eh ita naran simu deit?
Eh ita ba simu tanba rame-rame deit? ita adora lo-loos Maromak nia bibi oan nee iha ita nia fuan eh ita ba simu hanesan ita ba simu sesta bázika ou IIla idade neebe ba sarontu deit.
Liu husi Sakramentu Batizmu, ita mos hasoru malu ho Jesus, ita mos hahu konhese Jesus, nunee, ita hotu neebe simu ona Batista sai sarani, ita hetan vokasaun ida hodi sai hanesan João Batista. Ita buka iha ita moris atu haboot Maromak nia naran, husik Maromak nia naran lakan nabilan nafatin iha ita nia moris, no la facil atu monu ba tentasaun sira neebe dada ita nia fuan, hanoin no hakarak buat sira hanesan buka oin, buka naran, buka lukru, ikus mai buat sira nee halo ita hateke Maromak la hetan, hateke uma kreda la hetan, konsekuensia mak ita nunka besik uma kreda.
Ita mos labele uza Maromak nia naran hodi buka lukru no buka popular, basa ita hetan vokasaun sai sarani laos atu hetan poder maibe atu sai atan hodi serbi Maromak no serbi ita nia maun-alin sira. Ita sarani nia motto mak nee, “halo buat hotu laos atu haboot ita nia naran maibe atu haboot liu tan Maromak nia naran”.
Ita halo buat hotu nudar sarani, ita halo hodi hahi Nai Maromak, halo buat hotu hodi hawelok nai Maromak, laos halo hodi hetan hahi husi ema seluk ou hahi-an rasik. Basa, buat ida hahi nee la diak ida, ohin ema hahi, tane aas too lalehan, maibe aban ema trai, aban ema sona ho surik husi kotuk. Ezemplu konkretu ita haree momos iha ema Judeu sira, iha Domingu Ramos sira hahi Jesus, iha Sesta feira santa ema sira nee mak hedi Jesus ba cruz.
Nunee mos ita sarani sira, ita keta haksolok deit ho naran ida sarani nee, maibe ita buka moris nuudar sarani tuir doutrina Maromak nian. Ida nee mak sarani nia identidade lo-loos, katak moris tuir vontade Maromak Santissima: Aman, Oan no Espíritu Santu nia hakarak, laos moris tuir ita nia hakarak.
Husik Maromak Nia Naran, husik Jesus nia naran boot nafatin iha ita nia familia, iha ita nia komunidade no mos iha sosiedade nia leet, liu-liu iha tempu modernu ohin loron no ba nafatin…..AMEN.
(jos)
