DILI, STLTIMORLESTE.com – Maluk artista Timor oan sira neebe hetan oportunidade atu hatudu sira nia obra muzika tradisionais iha espozisaun neebe sei halao iha Italia tinan nee, nuudar meius ida hodi promove kultura no identidade Timor Leste nian bá iha mundu internasional.
Liafuan nee haktuir husi Profesora Joana da Costa bá STL iha Balide, Segunda (19/01/2026).
Nia dehan, nuudar Timor oan orgulhu, tanba daudaun governu liu husi esforsu oin-oin lori maluk artista Timor oan sira bele hola parte iha espozisaun neebe sei halao iha Italia, hodi bele aprezenta sira nia obra liu husi muzika tradisionais neebe sira iha.
“Nuudar sidadaun no Timor oan hau senti kontenti, tanba maluk artista Timor oan sira laos hatudu deit sira nia obra iha rai laran maibe bele hatudu mos iha rai liur. Tanba obra neebe sira sei hatudu iha espozisaun estranjeiru nee promove ona kultura no identidade Timor Leste nia naran iha mundu no hatudu bá mundu seluk katak TL mos bele,” dehan nia ho kontenti.
Nia hatutan, liu husi muzika tradisionais sira nee mak promove identidade no kultura iha pais ida nee bá nasaun seluk. Tanba nee bá maluk artista Timor sira neebe hetan oportunidade bele hatudu sira nia obra sira ho diak, atu nunee bele atrai fali jerasaun foun sira neebe agora dadaun iha talentu musika tradisional bele kontinua lao tuir.
Nunee mos Estudante UNDIL Manuel dos Santos dehan, TL hanesan nasaun neebe hola parte ona iha CPLP no ASEAN, tanba nee nudar nia sidadaun no joven iha pais nee senti kontenti, bainhira TL mos hola parte hotu iha espozisaun sira neebe halao iha nasaun seluk.
“Hau kontenti tebes maluk artista Timor oan neebe hetan oportunidade tuir kompetisaun iha rai liur, bele lori sira nia musika hodi aprejenta iha espozisaun neebe sei halao iha Italia tinan nee. Liu husi musika tradisionais neebe sira aprejenta bá nee, promove dadaun kultura no identidade TL nian bá nasaun sira seluk,” nia tenik.
Nia hatutan, hakarak ka lakohi TL Tama ona ASEAN, tenke prepara nia ema sira hodi tuir kompetisaun iha nasaun seluk.
Iha sorin seluk informasaun neebe diariu nee sita husi pajina media SEAK hatete, iha loron Domingo (18/01/2026) artista Timoroan nain 3 neebe liu ona selesaun kompetisaun ba atividade Exposisaun Biannale 2026, halo ona aprezentasaun ba obra neebe sira iha, hodi aprezenta ba dala 2 iha Expozisaun Biannale, neebe sei halao iha Novembru tinan nee iha sidade-Venice Italia.
Artista nain 3 sei halo aprezentasaun ba sira nia obra mak hanesan, Artista Verônica ho kombinasaun muzika tradisionais Timor Leste nian ba muzika kultura ASEAN.
Artista Etson Caminha no Juventino Madeira, sei halo vídeo-mapping liga ba kultura no identidade Timor Leste nian, hodi ba aprezenta iha espozisaun refere.
(dom)
