DILI, STLTIMORLESTE.com – Padre Richardo Pasang SVD hatete, ema idak-idak presiza tau importansia ba obediensia no lealdade ba Maromak.
Padre hatoo lia hirak nee ba jornalista STL liu husi refleksaun Tersa (20/01/2026) hatete, refleksaun ohin haklaken kona-ba obedese no fiel ba Maromak.
Padre dehan, devosaun ohin konvida ema atu reflete kona-ba importansia obediensia no lealdade ba Maromak.
“Iha primeira leitura, 1 Samuel 15:16-23, ita haree oinsa Liurai Saul la halo tuir Maromak nia mandamentu, hodi rezulta Maromak rejeita nia nuudar liurai. Pontu balu atu hanoin klean obediensia sinseru,” dehan Padre.
Padre hatete, iha evanjelhu mos koalia kona-ba oinsa mak halo tuir Maromak nia hanorin sira no nafatin fiel no lealdade ba Maromak.
“Iha Evanjelhu Marcos 2:18-22, Jesus konvida ita atu iha obediensia sinsera no moos, laos formalidade deit. Nia kompara Nia aan ba Noivu neebe lori ksolok no moris foun. Ita hetan konvite atu sai bikan kulit foun neebe bele kaer tua foun, katak moris foun iha Kristu. Ita hetan konvite atu transforma ita nia aan ho Jesus nuudar Noivu, tua fatin foun sira,” katak Padre.
Ema presiza tau konfiansa iha Kristu no nafatin fiel iha Kristu no akomoda Maromak nia obra iha ema nia moris.
“Reflesaun oinsa ita hatan ba bolun atu obediensia sinseru? Obediensia laos hanesan papagaiu ka simplesmente tuir, maibe obediensia ba transformasaun, ita hakarak sai bolsu foun neebe bele akomoda Maromak nia obra iha ita nia moris? Atu sai “bolsu foun”, loke ita nia aan, prontu atu formata husi Maromak nia domin,” katak Padre.
“Mai ita reza atu Maromak tulun ita atu iha obediensia neebe sinseru no moos, no sai kanal bensaun nian ba ema seluk. Labele finje sai obediente no fiel,” katak nia.
Bibi Atan kreda Katolika husu nafatin sarani hotu hotu nafatin fiar iha Kristu, no ema idak idak presiza tau importansia obediensia no lealdade ba Maromak.
(eme)
