DILI, STLTIMORLESTE.com – Relasiona ho Aniversariu Jornal Suara Timor Lorosae (STL) nian ba dala 33, jurista hatoo nia parabens, konsidera ezistensia STL fo kontribuisaun boot.
“Hau parabeniza aniversariu jornal STL ba dala 33, ezistensia STL durante okupasaun Indonezia too ita ukun rasik aan fo ona kontribuisaun boot rai ida nee, liu-liu iha area informasaun husi kualker aspetu,” dehan Jurista Sergio Dias Quintas ba STL iha Kaikoli, Tersa (20/01/2026).
Tuir Sergio katak, ohin loron Jornal STL nuudar pilar ida importante hodi harii sosiedade ida demokratiku, tanba publikasaun Jornal STL durante nee relevante, notisia neebe publika sai aktualizada husi fonte neebe kredivel.
Espera katak Jornal STL kaer metin nafatin prinsipiu hodi halo kontrolu sosial. No bainhira iha kontrolu sosial ida forte sei hamosu sosiedade ida neebe ekilibriu no balansu, signifika katak bainhira iha kontrolu sosial ida forte bele sai lalenok hodi harii justisa sosial no ekonomia ba ema hotu.
Iha fatin ketak, Akademiku UNTL, Rafael Dos Santos dehan, parabens ba Jornal STL, husu atu kontinua publika notisia neebe relevante ba iha publiku.
“Hanoin ezistensia Jornal STL importante, husu atu ba oin kontinua publika notisia neebe relevante ba iha sosiedade, liu-liu povu kiik sira nia lian,” dehan nia.
Nia dehan, notisia neebe publika tenke relevante, atu hatoo buat neebe aktual hodi dada leitor sira nia vontade hodi bele lee kona-ba publikasaun neebe iha.
(ter)
