DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguida inisial EMBS hanesan feen, neebe halo agresaun ba lezadu ho inisal JVdS hanesan laen.
Tuir akuzasaun neebe iha katak, arguida EMBS relasaun ho lezadu JVdS hanesan feen ho laen.
Iha loron 04 fulan Julhu tinan 2025, Suku Komoro, arguida haree lezadu hemu tua iha estrada ibun, halo arguida hirus hodi lori liman basa iha lezadu nia hasan dala ida.
Lezadu mos nervozu hodi lori ain tebe dala ida ba iha arguida.
Konsekuensia husi arguida nia aktu nee, halo lezadu sente moras iha hasan hodi ba hatoo keixa.
Tanba nee, Ministeriu Publiku akuza arguida komete krime Violensia Domestika ho Forma Ofensa Integridade Fizika Simples, neebe previstu iha artigu 145 husi Kodigu Penal.
Hatan ba akuzasaun neebe iha, arguida deklara katak faktus neebe iha loos hotu.
Arguida deklara katak, momentu neeba lezadu ho kondisaun lanu, hasai liafuan mal ba iha arguida, tanba nee mak halo arguida nervozu hodi basa lezadu.
Arguida deklara tan, depois arguida basa tiha lezadu, lezadu mos nervozu hodi lori ain tebes arguida.
Arguida rekonhese aktu neebe arguida halo sala, tanba nee arguida arepende ona. No momentu akontese problema, depois liu tiha loron ida arguida no lezadu diak malu fali.
Lezadu reforsa tan katak, arguida halo duni agresaun hasoru lezadu, maibe lezadu rekonhese sala tanba kondisaun lanu la kontrola aan hasai liafuan mal ba arguida.
Rona tiha deklarasaun husi arguida ho lezadu, Tribunal husu atu tama kedan ba iha alegasaun.
Iha alegasaun nee Prokurador Pedro Baptista deklara katak, arguida konfesa imparsial ba faktus, sira diak malu ona, tanba nee husu Tribunal fo pena Admoestasaun ba iha arguida, hanesan samada ida atu iha futuru arguida labele pratika tan krime refere.
Enkuantu iha alegasaun, Defeza arguida nian Advogadu Estajiadu deklara katak, aseita ho pedidu Ministeriu Publiku nian neebe husu atu aplika Pena Admoestasaun ba arguida.
Rona tiha alegasaun, Tribunal haree katak aktu arguida nian prienxe ba elementu objetivu no subjetivu. Maibe arguida arepende ona, tanba nee Tribunal deside hodi aplika Pena Admoestasaun ba arguida, hanesan samada ida atu iha futuru arguida labele pratika tan aktu nee.
Audensia julgamentu nee prezide husi Juiz Singular Fransiaca Cabral, Ministeriu Publiku reprezenta husi Prokurador Pedro Baptista, arguida hetan asistensia legal husi Advogadu Estajiadu.
(ter)
