DILI, STLTIMORLESTE.com — Lian nee universal, hatene lian barak liu lori vantajen diak ba ema neebe hatene lian barak, tanba hatene lian barak bele komunika ho se deit, tanba nee la sala ida kuandu Timor adopta lian Indonezia sai lian ofisial iha Timor Leste.
Tuir Akademista Mauloy Xavier katak mundu ohin loron presiza hatene lian oin oin hodi bele halo interasaun ho maluk sira seluk husi nasaun seluk, sa tan hanesan nasaun vizinu Indonezia, Timor oan sira presiza aprende mos sira nia lian para bele fasilita iha komunikasaun neebe diak liu.
“Ita nasaun vizinu mak la hatene fali vizinu sira nia lian nee aat los, tanba nee apoiu tebes kuandu Timor mos adopta lian indonezia sai lian ofisial,” hatete Xavier ba STL iha Balide, Dili, Kuarta (21/1/2026).
Xavier hatete Timor oan tenke tau nia aan hanesan sidadaun husi nasaun ida, sikat iha nasaun barak nia leet, Timor Leste laos mesak, Timor Leste iha nia nasaun amigu sira nia leet, tanba nee labele izola an, kuandu ba Indonezia presiza hatene lian indonezia hodi bele konversa ho sidadaun indonezia.
“Uluk nee tempu kolonial nee ita hatene deit portugues no Indonezia, agora Timor nasaun independente no soberanu nakloke ba nasaun seluk, ita bele ba vizita sira, sira mos bele mai, kuandu ita hatene sira nia lain nee furak los, tanba bele koalia ho sira,” argumneta Mauloi.
Nia informa katak depois Timor Leste sai membru ASEAN, iha nasaun boot rua mak uza lian Indonezia hanesan parte ba grupu lian malayu, mak Indonezia, Malaysia, Brunei Darusalam, rai rua nee besik los Timor, tanba nee lalika hanoin pasadu, hodi izola an, maibe hare katak lian nee importante ema hotu atu aprende.
“Ita iha Timor oan lubun boot ida ba eskola iha Indonezia, sira nia estudu ho lian Indonezia, loro loron komunika ho lian indonezia, nee se ita opta lian indonezia nee diak liu, laos hanesan nee be indonezia atu mai ukun fali ita, hanoin hanesan ida nee sala, indonezia sei la mai ukun fali ita, portugal mos lae, ita nasaun independente no soberanu,” komenta Xavier.
Antes Prezidente Republika, Jose Ramos Hosta deklara katak, Timor Leste presiza adopta Lian Indonezia sai lian ofisial tanba Timor Leste ho Indonezia nasaun vizinu, no iha timor oan rihun ba rihun ba ba eskola iha Indonezia.
“Uluk kedas hau husu ba maun Xanana atu ita adopta Lian Indonezia sai lian ofisial, tanba ita nasaun vizinu, ita nia joven rihun ba ribu ba eskola iha Indonezia,” hatete PR Horta.
(god)
