DILI, STLTIMORLESTE.com – Previzaun tempu loron ohin (23/01/2026), kondisaun anin neebe sei fo atensaun espesial ba iha Kosta Norte no Leste, prinsipalmente iha rejiaun kosterias liu-liu iha munisipiu sira hanesan Manatuto, Baucau, Lautem, Kovalima, Bobonaro, Atauro, inklui RAEOA.
Tuir informasaun neebe STL sita husi media Diresaun Nasional de Meteorologia e Geofisica (DNMG), Sesta nee (23/01/2026) hatete, kondisaun anin atensaun espesial ba velosidade anin iha Kosta Norte prinsipalmente iha Rejiaun Kosterias, liu-liu iha munisipiu sira hanesan: Manatuto, Baucau, Lautem, Kovalima, Bobonaro, Atauro inklui RAEOA.
Velosidade anin ba loron ohin sei kontinua persiste huu ho velosidade forte – extremu (22-30 km/h) iha munisipiu sira neebe mensionadu ona iha leten. Enkuantu restante munisipiu sira seluk, kondisaun refere sei varia husi moderadu/naton ba forte (12-24 km/h) tantu iha rejiaun kosterias kuantu iha rejiaun montanhosa/foho.
Entretantu kondisaun laloran tasi atensaun espesial ba laloran tasi nia aas, prinsipalmente iha Kosta Norte no Leste, liu-liu iha munisipiu sira hanesan Manatuto, Baucau, Lautem no Atauro.
Laloran tasi nia aas ba loron ohin sei varia husi moderadu ba forte (1.2-1.7 m) iha Kosta Leste no Norte, liu-liu iha munisipiu sira neebe mensionadu ona iha leten. Restante munisipiu sira seluk iha Kosta Sul no Oeste, kondisaun refere sei varia husi normal ba moderadu/naton (0.8-1.0 m).
Entretantu kondisaun tempu, udan ho intensidade fraku kuaze teritorrio nasional, exceptu munisipiu hanesan Manufahi, Manatuto, Bobonaro inklui RAEOA mak kontinua persiste udan ho intensidade fraku ba moderadu no lokalmente ba forte.
(dom)
