DILI, STLTIMORLESTE.com – Setor agrikultura pilar importante hodi kontribui ba ekonomia rai laran too agora lao, maibe sei hakdasak, tanba nee tenke tau importansia ba iha setor nee.
“Setor agrikultor lao, maibe sei hakdasak hela, tanba ita nia irigasaun no natar sei abandona, nomos iha bee balun husik suli livremente no lauza ho lolos, tanba setor agrikultura nee importante tebes fo kontribuisaun ba ita nia ekonomia,” dehan Veteranu Lourenco Ximenes alias Maulelo ba STL iha Mascarinhas, Dili, Kinta (22/1/2026).
Tanba nee Timor Leste (TL) depende mina rai nomos produtu importasaun, tanba durante nee produtu husi rai liur mak tama, maibe atu eksporta nee sei menus, tanba produtu lokal mos menus.
Nia dehan, agrikultor sira produs maibe ba nia nesesidade loron-loron nian, tanba nee hanesan hare, batar kuda neebe kuda han ba tinan ida nian, maibe tempu naruk nee laiha, oituan han nomos faan iha merkadu rai laran nee, maibe dala ruma seidauk too, oinsa hanoin atu eksporta nee seidauk, entaun durante nee husi rai liur mak importa produtu mai Timor hodi uza nee.
Tanba nee husu Ministeriu Agrikultura Pekuaria Peskas no Floresta (MAPPF) oinsa ba oin tenke tau perioridade ba setor agrikultura nee, oinsa motiva agrikultor sira fo formasaun atu nunee sira iha konhesimentu para produs barak.
Nunee mos ba natar sei abandona bele hadia irrigasaun atu iha bee para agrikultor halo natar, se bee laiha oinsa atu fornese bee ba iha natar.
“Tuir hau nia hare ekonomia sei fraku hela, tanba produtu lokal sira nee mos depende ba rai seluk hanesan fos, ikan, tomate, lis no seluk tan, tanba iha Timor iha hela entaun osan laos sirkula rai laran, maibe ba hotu iha rai liur nee susar ba TL,” dehan nia.
Nia informa, produtu Timor atu esporta oituan kompara ho produtu importasaun barak.
(joa)
