DILI, STLTIMORLESTE.com – Ministeriu Saude (MS), liu husi Edukasaun Promosaun Saude (EPS) halao atividade kona-ba moras dengue ba komunidade sira iha Munisipiu Dili.
Tuir Pesoal Saude iha Sentru Komoro neebe lakohi temi naran hatete, moras dengue iha sentru saude nee agora sae makaas. Loron-loron simu no baixa iha nee, maibe tanba fatin iha nee klot no limitadu tebes, entaun tenke transfere fali ba iha Sentru Saude Vera Cruz no HNGV.
Tuir nia, pasiente neebe kona moras dengue nee maioria labarik kiik oan sira. Loron-loron moras nee sae hela deit.
“Ami nia sentru nee rejistu kazu dengue barak los, tanba lor-loron pasiente sira mai hela deit,” dehan nia ba STL iha Komoro, Sesta (23/01/2026).
Nia hatutan, atu halo prevensaun ba moras nee atividades barak mak sentru saude halo ona. Hanesan halo edukasaun promosaun saude ba komunidade sira, atu eduka komunidade sira kona-ba prevensaun ba moras dengue, ezemplu: hamos bee neebe nakonu iha kalen aat, bee nalihun iha uma ninin, taka masa matan, hamos tanki neebe foer.
Entretantu iha Sabadu (24/01/2026) nee Ministeriu Saude liu husi Servisu Saude Munisipiu Dili, hamutuk ho Diresaun Nasional Edukasaun no Promosaun Saude, kolabora hamutuk ho Universidade 5 mak hanesan: UNPAZ, UNDIL, UNITAL, ISC no ICS, hodi halo atividade Promosaun Saude kona-ba moras dengue.
Atividade ida-nee halao iha komunidade Suku Comoro Aldeia 12 de Outubro no Suco Bairo Pite, ho objetivu atu tuir ba komunidade sira nia bairo no uma, hodi fo informasaun direta kona-ba moras dengue ho sintoma sira, no dalan prevensaun atu prevene moras dengue.
Iha atividade promosaun saude nee ekipa fo avizu iha bairo laran no tama sai uma no ekipa servisu saude no estudante universitariu sira mos fahe brosur informasaun kona-ba moras dengue ba komunidade, atu ajuda komunidade sira kompriende diak liu tan kona-ba dalan prevene dengue iha uma no ambiental sira.
Aleinde nee ekipa promosaun saude mos fo edukasaun no halo kedan pratika kona-ba importansia atu hamoos ambiental hanesan, fakar bee foer iha balde aat laran, kalen aat laran, botir laran, roda aat laran, bidon aat laran no hasai sasan sira neebe bele sai fatin moris ba susuk dengue.
Ministeriu da Saude hein katak, liu husi kolaborasaun servisu hamutuk ho instituisaun edukasaun no instituisaun non governamental no Autoridade lokal no envolvimentu komunidade, bele hamenus risku moras dengue no hasae kualidade moris komunidade nian.
(dom)
