BAUCAU, STLTIMORLESTE.com — Durante fulan neen (6) ona Sentru Lojístiku Nasionál (CLN) Munisípiu Baucau enfrenta falta stok fós.
Deklarasaun ne’e hato’o husi Xefe Armajen CLN Baucau, Agostinho Pereira da Silva ba STL liuhusi telefone, Tersa (13/10/2026).
“Agora fós laiha. Stok laiha ne’e parese fulan neen ona, maibé ha’u halo pedidu mak foin drop mai,” Agostinho deklara.
Nia esplika katak, maski armajen CLN Baucau laiha stok fós durante períodu ne’e, situasaun ne’e la impede instituisaun atu kontinua halo intervensaun folin fós iha merkadu sira iha Munisípiu Baucau, Lautém no Viqueque.
Agostinho hatete katak, bainhira pedidu husi autoridade suku sira liuhusi postu administrativu to’o iha autoridade munisipál ba CLN Baucau, instituisaun ne’e sei haruka pedidu ba CLN Nasionál atu aloka fós tuir nesesidade ne’ebé hato’o.
Nia fó ezemplu katak, durante fulan Juñu to’o períodu ne’ebé stok fós laiha, CLN Baucau kontinua responde ba pedidu husi Postu Administrativu Baguia, Laga no suku sira iha Postu Administrativu Baucau Vila.
“Sim, durante fós laiha ita halo intervensaun foin dadauk iha Baucau Vila nian, iha fatin barak tun to’o Buruma,” Agostinho informa.
Nia aumenta katak, to’o ohin loron CLN Baucau seidauk simu pedidu foun kona-ba intervensaun folin fós iha merkadu. Maski nune’e, armajen kontinua hein pedidu husi autoridade lokál atu bele responde tuir nesesidade.
Hare Kulit Tonelada 60 Sei Disponivel
Maski stok fós iha armajen CLN Baucau mamuk, Agostinho informa katak, armajen sei iha hare kulit ho kuantidade tonelada 60 ne’ebé disponivel.
Nia mós esplika katak, stok fós no hare kulit iha armajen Tibar no Natabora sei iha prosesu atu prepara intervensaun, bainhira CLN simu pedidu husi autoridade suku sira.
Iha parte seluk, Agostinho esplika katak, folin fós CLN nian diferente kompara ho fós ne’ebé fa’an iha loja komersiál sira.
“Fós CLN nian ne’e presu diferente ho fa’an iha loja sira ne’e. Ezemplu, 10 kilogram ami fa’an ba US$ 4.50, 20 kilo fa’an ba US$ 9.00,” nia dehan.
(tom)
