DILI,STLTIMORLESTE.com — Federasaun Voleibol Timor-Leste (FVTL) aloka osamentu US$ 350.000 ba kompetisaun Liga Voleibol Timor-Leste, hahú husi 3.ª Divizaun, 2.ª Divizaun to’o 1.ª Divizaun, durante fulan Maiu to’o Dezembru 2026.
Prezidente Federação Voleibol Timor-Leste no responsável máximu kompetisaun, Inocêncio Araújo da Silva, hateten katak kompetisaun 1.ª Divizaun, 7.ª Époka 2026, partisipa husi ekipa mane na’in walu no ekipa feto na’in hitu.
Nia esplika katak, tuir planu inisiál, ekipa feto tenke iha na’in walu. Maibé, depois enkontru tékniku iha loron 10 Outubru 2026, Prezidente Klubu Zona Mesak submete karta rezignasaun tanba enfrenta dezafiu internu iha klubu.
“Tanba razaun ne’e, ekipa feto ne’ebé partisipa iha 1.ª Divizaun ba 7.ª Époka 2026 hamutuk na’in hitu, enkuantu ekipa mane hamutuk na’in walu,” Inocêncio Araújo da Silva hateten ba jornalista STL, iha Ginásiu Dili, Segunda-feira, 13 Outubru 2026.
Nia kontinua esplika katak, kompetisaun hahú ho serimónia abertura iha loron 12 Outubru no sei kontinua to’o loron 27 Outubru 2026. Depois, organizadór sei suspende jogu temporariamente atu fó tempu ba komemorasaun Loron Matebian.
Depois de períodu ne’e, kompetisaun sei para tan durante fulan ida tanba hala’o Festival Nasionál Desportu (FND), ne’ebé inklui modalidade desportiva liu husi sanulu.
“Depois de remata atividade FND, ita sei kontinua fali Liga Voleibol iha loron 7 Dezembru 2026 no finaliza kompetisaun iha loron 18 Dezembru 2026,” nia afirma.
Konaba osamentu, Inocêncio hateten katak montante US$ 350.000 ne’e aloka atu suporta kompetisaun liga husi 3.ª Divizaun to’o 1.ª Divizaun, ho objetivu atu dezenvolve desportu voleibol iha Timor-Leste.
Iha 3.ª Divizaun, kompetisaun hala’o iha munisípiu sira, no ekipa kampiaun husi munisípiu sira hetan oportunidade atu mai Dili kompete iha 2.ª Divizaun.
Depois, ekipa ne’ebé hetan pozisaun primeiru, segundu no terseiru iha 2.ª Divizaun mak hetan oportunidade atu promove ba 1.ª Divizaun.
Kompetisaun husi 3.ª, 2.ª no 1.ª Divizaun ne’e hahú husi fulan Maiu no sei remata iha fulan Dezembru 2026, ho esperansa atu hasa’e kualidade no dezenvolvimentu voleibol iha nasaun ne’e.
(leo)
