DÍLI, STLTIMORLESTE.com – Sekretariu Estadu Formasaun Profisionál no Empregu (SEFOPE) husu joven sira iha Timor-Leste atu hakbesik an ba sentru formasaun, hodi aumenta abilidade no kapasidade tuir nesesidade merkadu traballu.
Mensajen ne’e hatoo husi Sekretáriu Estadu Formasaun Profisionál no Empregu (SEFOPE), Rogério Araújo Mendonça ba jornalista sira iha salaun SEFOPE, Kaikoli, Tersa (13/10/2026).
Nia dehan, governu liuhusi SEFOPE kontinua lori programa formasaun profisionál ba munisípiu ida-idak, inklui rekrutamentu formadór sira no abertura sentru formasaun iha munisípiu sira.
Tuir nia, inisiativa ne’e importante atu ajuda joven sira ne’ebé seidauk iha abilidade no kapasidade sufisiente, hodi sira bele partisipa iha formasaun profisionál ne’ebé liga diretamente ho nesesidade merkadu traballu.
Nia mós enkoraja joven sira iha Timor-Leste tomak atu aproveita oportunidade formasaun ne’ebé disponivel, tanba koñesimentu no abilidade profisionál importante atu aumenta oportunidade sira-nia asesu ba empregu.
Joven Mario Oliveira hatete katak, nu’udar joven, nia sente kontente tanba SEFOPE loke sentru formasaun iha Díli no munisípiu sira. Nia konsidera katak, sentru formasaun sira ne’e fasilita joven sira atu aumenta kapasidade, liuliu iha lian Inglés no Koreanu, atu prepara an ba oportunidade servisu iha nasaun seluk.
Nia dehan, agora nasaun seluk presiza traballadór timoroan atu servisu iha sira-nia rai, nune’e joven sira tenke aproveita oportunidade formasaun ne’ebé governu oferese.
Enkuantu ne’e, joven Elisa da Silva hato’o agradese ba governu, liuhusi SEFOPE, tanba fó apoiu ba joven sira liuhusi programa formasaun profisionál.
Nia esplika katak, antes ne’e, iha munisípiu balu seidauk iha sentru formasaun iha área sira besik komunidade, nune’e joven sira hanoin atu ba Díli hodi partisipa iha formasaun.
Tanba ne’e, nia konsidera katak desizaun SEFOPE atu loke sentru formasaun iha munisípiu sira di’ak tebes, tanba fasilita joven sira atu hetan formasaun besik sira-nia hela-fatin, la presiza mai Díli.
(joa)
