DILI, STLTIMORLESTE.com – Iha semana kotuk ekipa husi Sentru Saude Komoro halo sosializasaun ba estudantes ensinu baziku filial no 5 Komoro.
Haktuir Koordenador Eskola Baziku filial (EBF) no 5 Komoro, Marcelino Moniz ba STL, Segunda nee (26/01/2026).
“Iha semana kotuk ita nian ekipa saude husi Sentru Saude Komoro mak mai halo sosializasaun deit ba ita nian estudantes sira, nee momentu ita nian estudantes dader forma iha turma oin nee, depois sira fahe buat ida abate nee para bele tau iha tanki. Iha tinan kotuk nee lori aimoruk mai rega ona, maibe ba tinan ida nee seidauk rega,” nia informa.
Marcelino hatutan, agora tempu udan oinsa atu evita susuk iha areador eskola nian, menus ida tenke lori aimoruk mai rega, tanba moras dengue nee liu husi susuk neebe mak tata labarik sira, tanba nee iha semana kotuk husi saude mai halo sosializasaun ba estudantes sira.
“Liu husi sosializasaun neebe mak sira halo, fahe ona abate para bele tau iha tanki, maibe kuandu ita sei presiza tan mak kontaktu ho sira, atu nunee bele lori aimoruk mai rega iha ami nian eskola, ho nunee prevene husi dengue,” nia haktuir.
Iha fatin seluk, Diretor EBC Manleuana, Carlos Correia hatete, iha tinan kotuk mak husi saude lori aimoruk mai rega ona, maibe ba tinan nee mos presiza tan, tanba daudaun nee tempu udan halo susuk barak, tanba buat ida moras dengue nee liu husi susuk tata, entaun oinsa mak atu bele lori aimoruk rega sala aprendizajen.
“Hau hanoin iha tinan kotuk husi saude lori aimoruk mai rega ona, maibe ba tinan nee mos presiza tan, tanba daudaun nee tempu udan halo susuk barak, tanba buat ida moras dengue nee liu husi susuk tata, entaun oinsa mak atu bele lori aimoruk rega sala aprendizajen,” nia dehan.
Nia dehan, kuandu tempu udan nee susuk barak, tanba nee kada loron sira hamutuk ho estudantes halo limpeza iha areador eskola, atu nunee bele evita susuk iha areador eskola nian, husu estudantes tau lixu iha fatin neebe prepara ona.
(jac)
