DILI, STLTIMORLESTE.com – Diresaun Nasional Edukasaun Inkluzivu Asaun Sosial Eskolar (DNEIASE) halo ona sensibilizasaun iha munisipiu ualu (8).
Afirma Diretor Nasional Edukasaun Inkluzivu Asaun Sosial Eskolar, Fernando Soares ba STL, Tersa nee (27/01/2026).
“Ita halo hela sensibilizasaun edukasaun inkluzivu ba direjente husi eskola sira iha munisípiu 8 neebe mak ita halao ona sensibilizasaun kona-ba Edukasaun Inkluzivu ninia, oinsa atu bele haree labarik sira defisiensia iha eskola, tanba nee munisipiu 8 mak halao hotu ona, agora munisípiu balun mak seidauk, espera ita bele halao hotu,” nia esplika.
Tuir Fernando katak, husi diresaun ida nee halo ona sensibilizasaun edukasaun inkluzivu direjente husi eskola sira, direjente hirak neebe mak partisipa iha sensibilizasaun nee husi pre eskolar, ensinu baziku, sekundariu no tekniku vokasional. Sensibiliza ba sira para bele kompriende kona-ba edukasaun inkluzivu ninia.
“Hau hanoin durante nee DNEIASE halao ona sensibilizasaun iha munisipiu barak. Ba oin sei kontinua kobre ba iha munisípiu seluk, hodi nunee direjente husi eskola sira bele kompriende atu rekolha dadus ho ema defisiente neebe mak asesu ona edukasaun formal, tanba nee ita nian munisípiu balun neebe seidauk ita bele halao hotu,” katak nia.
Iha parte seluk, Diretor Eskola Sekundariu Nobel da Paz, Jeremias P. de Jesus hatete, kada tinan defisiente sira mai kontinua estudu iha eskola ida nee, tanba sira iha direitu asesu ba iha edukasaun formal.
“Oinsa ita nian maluk defisiente sira nee bele asesu ba edukasaun formal hanesan ho sira nian maluk sira seluk, tanba sira iha direitu asesu ba edukasaun no ami haruka eskola gratuita iha nee,” nia dehan.
Jeremias hatutan, maluk defisiente nee balun iha nivel sekundariu no balun iha nivel ensinu baziku. Sira hamutuk nain 10 nunee mak eskola iha Nobel da Paz, tanba kada tinan sempre ida rua mai eskola iha nee.
(jac)
