DILI, STLTIMORLESTE.com – Feto Potensial, Joana de Araujo hatete, feto tenke servisu hamutuk, dedika aan tomak ba rai ida nee, liu husi inspirasaun husi eroina sira neebe fo sira nia aan hodi luta ba ukun rasik aan.
“Husu ba feto maluk hotu mai ita hotu servisu nafatin hodi fo dedikasaun matenek no sakrifisiu ba Timor-Leste hodi dezenvolve rai nee liu husi inspirasaun eroina neebe fo aan ba mate hodi Timor-Leste hetan independensia,” dehan Joana ba STL, iha Mandarin, Dili, Tersa (27/01/2026).
Nia dehan, Timor-Leste feto barak mak iha kualidade atu kontribui ba dezenvolvimentu iha rai laran, tanba partisipasaun feto ba foti desizaun iha nivel baze sira menus tebes, presiza haree, tanba Xefe Suku liu liu feto sira nee halo servisu ida diak tebes.
“Ami haree presiza iha balansu lideransa entre feto ho mane iha partidu sira, atu nunee aesgura duni jeneru, tanba oras nee dadaun partisipasaun feto iha vida politika iha avansu boot, tanba feto barak mak hetan treinamentu no mos ho mundu ohin loron adapta teknolojia sira mos asesu ba informasaun hodi hasae kapasidade iha vida politika nian,”dehan nia.
Iha parte ketak Akademista UNDIL, Mafalda da Conceicao hatete, tempu agora joven feto ho mane iha abilidade neebe diak. Fiar katak iha futuru sei mosu maluk feto barak liu tan no sei akontese balansu jeneru iha vida politika iha Timor-Leste.
“Ami husu atu iha partidu sira labele halo diskrimisauan ba feto, maibe buka oinsa hatuur mos feto sira iha estrutura partidu, atu nunee iha tratamentu hanesan ba jeneru,” dehan Mafalda.
(car)
