AMBENO, STLTIMORLESTE.com – Hafoin Primeiru Ministru (PM) Kay Rala Xanana Gusmão vizita estrada kotu iha Sikone, PM kontinua vizita povu iha Suku Kutete no Komunidade Bairu Nun Ana. Iha 20 Janeiru 2026, akontese udan boot, iha kalan nee, estrada neebe normaliza husi Institutu Jestaun Ekipamentus (IGE) monu fali ona, tanba nee Diretor Regional Infraestrutura IGE sei halo intervensaun iha tempu badak.
Kestaun hatoo husi Diretor Rejional Infraestrutura (DRI), Remigio Nuno Sila ba STL hafoin partisipa enkontru ho Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu iha Salaun Gabinete Autoridade Prezidente Autoridade, Bairru Oebau, Suku Costa, Postu Administrativu Pante Makassar, RAEOA, Tersa (27/01/2026).
“Hau informa ona ba Xefe Suku Kutete no Xefe Suku Bobocase katak tempu badak IGE sei normaliza hikas estrada neebe monu iha Bairru Sikone Suku Bobocase neebe foin lalais nee IGE hadia estrada nee, konsege Xefe Governu ba vizita no kuda duut vetiver hodi satan rai halai, maibe liu tiha deit loron ida iha vizita PM Xanana nian ba Kutete no Bairru Nun Ana, estrada nee monu fali ona tanba udan boot, tanba nee hau orienta ona ekipamentus husi IGE nian, maibe sei hetan aluga husi parte balun, kuandu sira finaliza ona, sei ba iha Bairru Sikone atu normaliza tanba iha neeba, kuaze loron 3 ona la udan, ida nee diak atu hadia estrada nee,” dehan Remigio Nuno Sila.
Nia haktuir tan katak, dadaun nee husi Kompanhia Internasional, Waskita Karya, sei apoiu zumbo sementi mamuk atu nunee, tau ense rai henek hodi tau iha fatin refere Sikone, rai okos mamar tanba bee. Aleinde nee estrada ida iha Oenunu Suku Suni Ufe mos rai halai, maibe dadauk nee karreta bele liu. estrada ida mos kotu iha Suku Lelaufe, tanba nee orsida sei bá haree.
Iha sikun seluk, Angelo Coa konfesa katak, dadaun nee povu Kutete labele halo movimentu ho karreta tanba estrada kotu iha loron 21 de Janeiru 2026, hafoin PM Xanana vizita sira iha Kutete.
“Ami Agora dadauk nee, labele halo movimentu ba mai husi Knua Kutete ba Vila Oecusse uza karreta tanba akontese udan makaas iha loron 21 de Janeiru 2026, estrada neebe governu normaliza, kotu fila fali ona, tanba nee movimentu komunidade ho karreta ladiak ona.
(jos)
