DILI, STLTIMORLESTE.com – Jornal Suara Timor Lorosae (STL) sei selebra ninia aniversariu iha loron 1 fulan Fevereiru tinan nee, kompleta ba tinan ba dala-33, no povu tau nafatin konfiansa ba jornal refere.
“Parabens ba jornal STL neebe fo ninia didikasaun tomak ba iha prosesu dezenvolvimentu ita nian nasaun TL, dezde inisiu STT halo mudansa iha rezistensia, mai fali too ita ukun aan, tanba surat kabar neebe mak tuan iha ita nian Timor Leste, tanba iha tempu rezistensia mos halo ninia mudansa, sempre fo ninia hanoin ba iha mundu tomak asesu ba iha prosesu dezenvolvimentu nasaun Timor hahu husi inisiu too ita ukun rasik aan, nee servisu jornalista ninia, nee duni papel nee diak tebes,” dehan Koordenador Eskola Baziku Filial (EBF) Fatumeta, Manuel Pires ba STL, Kuarta nee (28/01/2026).
Nia dehan, fo ninia dedikasaun ba iha prosesu dezenvolvimentu nasaun nian moris nee diak tebes, fo ninia hanoin katak bainhira mak surat kabar STL nee hahu, primeiru mak vontade husi jornalista sira nian nee tenke, atu nunee sira tenke halao sira nian knaar nee ho diak, para bele fo informasaun aktual ba leitor sira.
“Povu nian konfiansa ba STL nee kapas tebes, hau atu fo hanoin katak ba oin jornal STL nee tenke hakerek mos historia, labele tau deit notisia, maibe presiza hakerek ho historia, tanba ema barak mak lee notisia no balun hakarak lee historia badak ruma neebe imi hakerek iha jornal STL, nunee ema gosta atu lee jornal STL, fo nafatin dedikasaun neebe mak diak ba povu no rai doben Timor Leste,” nia esplika.
Nia hatutan, nasaun nee presiza duni informasaun neebe mak klaru no diak husi ninia jornalista sira, tanba nee dala ida tan parabens ba jornalista hotu neebe mak agora daudaun servisu iha STL, nafatin sai profisionál liu tan iha futuru.
(jac)
