DILI, STLTIMORLESTE.com — Veteranus husi munisipiu 13 kontinua ba iha Ministeriu Asuntu Kombatente Libertasaun Nasional (MAKLN), hodi trata resibu pagamentu, maske orariu atendimentu remata ona.
Tuir Armando da Conceição Araujo, atendimentu ba resibu pagamentu veteranu nian remata iha segunda (26/1/2026), maibe veteranu sira kontinua mai iha ministeriu hodi hetan resibu, tanba seidauk simu.
“Tuir orariu neebe hau hare horiseik Segunda (26/01/2026) nee loron ikus ba Munisipiu Vikeke, maibe ami neebe seidauk hetan tenke mai, foti resibu hodi simu ami nia direitu,” dehan Armando ba STL iha areador MAKLN, Komoro, Dili, Tersa (27/1/2026).
Armando akompanha nia pai neebe idade avansadu, mai iha Dili, hodi trata resibu pagamentu nian, tanba iha semana hirak liuba nia pai labele tun mai Dili, tanba ema barak, nunee hein tempu folga foin tun mai.
Realidade ema neebe mai trata resibu nee ladun barak hanesan iha loron lansamantu no semata primeiru, ema barak los.
“Iha momentu neeba ami hare ministeriu nee nakonu ho ema, nunee katuas tauk tun mai Dili, katuas dehan se governu atu foti fali nia osan foti ba, iha funu hau la mate, ukun ona hau ba mate fali ba osan, nee ema dehan saida,” Armando haktuir.
Nia informa katak depois hare iha media sosial, ema hadau malu, dudu malu, nia laiha tiha interese ba osan nee, tuir nia pai, funu nee ema hotu terus, ema terus nee ba ukun aan laos atu simu osan, neebe atu simu ka la simu, laos problema, importante timor ukun aan, moris hakmatek, buka saida tan,” dehan Armando.
Nunee mos Selestino Ximenes, lamenta ho prosesu pagamentu veteranu sira nian, neebe lori tempu tebes, hodi sakrifika inan aman veteranu sira neebe maioria idade avansadu tenke mai terus iha ministeriu ida nee.
“Ita hare prosesu ida nee atu oho ema, katuas sira kaer aitonka tenke mai iha nee, balu matan att tan, governu labele fasilita aman no inan sira hanesan nee atu hetan sira nia osan terus nian,” nia hatete.
Governu atribui ona pensaun ba veteranu nee parte ida neebe merese atu agradese, mas se hare didiak, ukun aan nee ema hotu nia kontribuisaun, neebe se estadu valoriza ona inan aman sira, governu tenke trata ho dignu, labele husik inan aman sira ho kursi roda mai too iha ministeriu, nee labele.
“Hau kuandu rona inan aman sira mai toba iha nee hodi hetan resibu, hau dehan ita nia maun Ministru Gil nia governa ministeriu ida nee sei fraku, tanba veteranu ida rihun ba rihun ita prepara deit fatin ida hodi atende, nee maun bele doutor ba mos labele, realidade iha duni lamentasaun oin oin husi veteranu sira,” nia relata.
Selestino hatete resibu nee lolos la presiza lulun veteranu sira husi munisipiu mai hotu Dili, tanba komisaun sira iha munisipal mos bele atende, mas kuandu buat hotu sentraliza iha ministeriu konsekuensia mak ema mai dudu malu, tolok malu, insulta malu.
“Agora diak ona, folga, ema la hadau malu, lutu besi sira sobu tiha ona, komesa atende fali husi sorin, nee ita hare diak ona, mas uluk, ita hare nee laiha korajen atu mai, trata resibu,” nia tenik.
(god)
