BAUKAU, STLTIMORLESTE.com – Media Suara Timor Lorosae (STL) uluk ho naran Suara Timor Timur (STT), mak media nasional neebe barani publika informasaun iha tempu okupasaun Indonezia.
Prezidente Konselhu Munisipal Kombatentes Libertasaun Nasional (KMKLN) Baukau, Cornelio Gama “L7” hateten, media nasional sira hanesan Grupo Media Nasional (GMN) no seluk tan neebe daudaun eziste iha Timor Leste, nia kontribusaun liu husi publikasaun relasiona ho povu no FALINTIL nia mehi ba luta libertasaun nasional laiha, tanba media hirak nee foin eziste iha faze Timor ukun aan nian, maibe media STL eziste iha tempu okupasaun Indonezia enfrenta situasaun manas, tanba FALINTIL luta kontra invazor Indonezia, maibe jornalista sira husi media STL barani tebes halo intervista ho FALINTIL sira iha ailaran hodi divulga informasaun ba rai liur.
“STL nia barani mak koalia ho ami hotu iha ai-laran publika ida nee konsege rona, vizaun ida konsulta ami nee ho vizaun ida deit, neebe laiha ema ida kontra, se ema ida kontra husu ami tebes ga lae. Hanesan hau iha ai laran jornal ida nee mak iha duni vizaun ida atu ajuda povu no nasaun koalia ho lia loos,” hateten L7 ba STL iha knaar fatin Vila Antiga Baukau, Kinta (29/01/2026).
Tuir veteranu nee katak, durante tempu okupasaun Indonezia, media internasional sira mos apoiu publiku Timor Leste nia informasaun ba mundu, maibe maioria notisia sira neebe media internasional publika opiniaun husi rai liur deit, enkuantu media STL iha momentu neeba sempre rona FALINTIL sira, tanba hakarak notisia balansu.
Nia komenta, STL nia notisia iha momentu tempu okupasaun Indonezia sempre afavor ba FALINTIL sira neebe nia publikasaun sira ba mundu ho lia loos tuir historia luta Timor nian hahu husi tinan 1975 too 1999.
“STL nia jornal importante iha mak koalia kona-ba prinsipiu 1975 nian, koalia iha neeba hau lee dala ida, nee nia konsulta ai laran liafuan lia loos mak hanesan nee, GMN nee ikus, STL nee uluk prinsipiu too agora, afavor ba funu, afavor ba istoria internasional, rona mos nia lia loos nafatin,” L7 dehan.
Veteranu nee husu ba STL atu nafatin kaer prisipiu jornalistiku, etika no produz notisia kualidade hodi hatudu ba mundu ezistensia STL nian ho lia loos hanesan publikasaun notisia sira iha tempu okupasaun Indonezia.
Maibe tuir veteranu nee katak, STL prezisa hadia iha area kobertura nian, tanba seidauk halo kobertura masimu iha area remotas sira liu liu publika populasaun sira nia sofrementu.
(tom)
