DILI, STLTIMORLESTE.com – Observador Politika, Daniel Soares hatete, bainhira Partidu Politiku (ParPol) ida la iha orientasaun atu halo kaderizasaun ba iha ninia membru sira, signifika ParPol nee laiha fuan, tanba hanoin deit oinsa atu hetan poder ba ukun.
Dehan Daniel ba STL, iha nia knaar fatin, Kaikoli, Dili, Kuarta (28/01/2026).
“Bainhira partidu ida nia orientasaun nee ba deit oinsa atu konkista poder, maibe nia la prepara ninia kuadrus neebe iha kualidade hodi halo subtituisaun ka halao kaderizasaun, ita bele dehan lider partidu sira la iha fuan, tanba hanoin deit mak oinsa bele konkista poder,” hatete Daniel.
Partidu politiku sira tuir nia nuudar pilar demokrasia nian iha papel neebe importante tebes, papel ida neebe importante liu mak prepara lider nasional ida. Tanba nee, partidu sira tenke kria mekanizmu atu halo rekrutamentu no kaderizasaun iha partidu laran.
“Primeiru bazeia ba lei nee legalmente organizasaun neebe mak priensi dokumentu legal, administrativa kerjer nee partidu politika ona,maibe partidu politika ezerse sira nia funsaun too ohin loron seidauk diak,” dehan nia.
Iha parte ketak Akademista UNPAZ, Anacleto do Santos hatete, ezistensia partidu politiku sira iha Timor-Leste, sira la halao knaar hanesan partidu politika, tanba haree husi rezultadu Deputadu sira iha uma fukun Parlamentu Nasional (PN) mesak kuadru antigu sira deit mak tur iha PN.
“Ita hare iha tinan hira nia laran nee ladun diak,tanba ita haree husi rezultadu reprezentante Deputadu iha uma fukun Parlamentu Nasional, ita haree kaudrus sira nee kuaze sira antigu,” dehan Anacleto.
(car)
