DILI, STLTIMORLESTE.com — Jerasaun Patriota, Martinho de Oliveira husu ba governu atu buka tuir restu mortais sira neebe too agora seidauk hetan.
“Ami husu ba governu oinsa buka halo ligasaun ho parte Indonezia, atu bele lori hikas ita nia eroi sira neebe mak mate iha funu laran iha tinan 1975,” dehan Martinho ba STL iha Lecidere, Dili, Kinta (29/01/2026).
Nia dehan, governu liu husi Ministeriu relevante presiza halao aprosimasaun ho governu Indonezia para depois bele hetan resposta ruma husi restus mortais Timor oan sira nee. Tanba hanesan hotu hotu asisti ezijensia Jerasaun Patriota sira nian hanesan mai husi familia sira neebe maka lakon sira nia inan, aman, oan, maibe preokupasaun sira nee kontinua laiha resposta too agora.
“Tanba nee ita preokupa. Maibe nafatin ita husu para depois governu halo tentativu sira aproxima ho governu Indonezia, para depois bele lori hikas mate ruin sira neebe mak lao ho estensivu inklui saudozu, Nicolau dos Reis Lobato nia ruin”, dehan Martinho.
Iha parte ketak, Veteranu Antonio Mendonca hatete, serimonia hotu-hotu tenke iha um minutu de silensiu, maibe governu nunka iha hanoin hodi buka tuir restu mortais sira nee lahatene ohin loron iha neebe. Loos duni ema ida labele hetan sira nia klamar iha neebe. Maibe pelumenus sira restu mortais sira nee, governate tenke buka tuir ema soe tun sae, balu mate iha ai laran hanesan animal fuik balu.
“Hau hatene katak Indonezia sira mos laos hanesan sira uluk, agora sira hakarak duni ajuda ita oinsa mak ita bele, tanba sira hakarak ajuda ita maibe ita mos keta haluhan ba malu tenke fo liman ba malu hanesan maun ho alin,” dehan nia.
(car)
