DILI, STLTIMORLESTE.com – Asesor prinsipal iha area Politika Prezidente Republika, Jeneral Reformado Lere Anan Timur hatete, tanba konsekuensia funu halo saudozu barak ruin la hetan too ohin loron. Dalan neebe familia no estadu halo mak halo tuir Kultura Timor nian, bolu deit hodi halot tuir tradisaun.
Asesor Prinsipal iha area Politika Prezidente Republika, Jeneral Reformado Lere Anan Timur hatoo kestaun nee ba STL, bainhira remata entrega sertifikadu rekonhesimentu ba ekipa neebe halao servisu iha Mindelo iha Palasiu Prezidensial Nicoalau Lobato, Dili, Kinta (05/02/2025). Nia hatete, tanba deit funu nia hahalok halo saudozu barak too oras nee familia seidauk hetan sira nia ruin.
“Saudozu sira nia ruin neebe seidauk hetan nee lakon ona, ita nuudar Timor, tradisaun Timor ita buka la hetan, ita halo saida, ita bolu deit ona nee konsekuensia funu barak mak hetan maibe la hatene se nia familia, barak mos la hetan, ezemplu iha matebian ema rihun atus mak mate iha neeba Indonezia oho, inimigu oho laiha tempu hakoi sira, balun iha neeba too dodok deit, sira neebe lori lakon ba oho iha neebe, la hatene familia balun iha fatuk koak fatuk taka metin too agora la hasai buat sira nee hotu, entaun ita halo nusa tuir ita nia tradisaun Timor, ita bolu sira nia klamar mai simboliza ho fatuk ruma, ai ruma hakoi,” dehan Jeneral Leferomado Lere.
Nia hatete, ema barak mak mate iha funu laran, ruin too oras nee seidauk hetan no dalan neebe familia sira atu halo mak bolu deit tuir kultura Timor nia simboliza ho fatuk ba hakoi.
Hanesan iha Semiteriu Metinaro barak laos ruin mak iha neeba, maibe simboliza tuir kultura Timor nia bolu mak ba hakoi iha neeba, tanba nee sira neebe lakon nee simboliza deit.
“Ida fali saudozu Nicolau Lobato nia, povu no familia ezije maibe ida nee mos isin lakon, ida nee defende ita nia jenerais sira neebe agora sei moris iha Indonezia, sira tenke barani moe nee tau iha kotuk neeba, ita ukun aan ona sira mos nasaun soberanu, ita tenke transparante ba malu, sira la hatene tebes ka ou sira hatene mak lakohi fo sai,” dehan Lere.
Lere dehan, nia hasoru nia oan Boby nia aman hakiak Brigadeiru Sortono hatete, uluk saudozu Nicolau Lobato mate nian mos oin iha hospital, agora halo ba HNGV nee, no sira lori mai falun ho hena mutin no ema tesi saudozu Nicolau nia liman fuan sorin.
“Nia mak tesi ka se mak tesi hau lahatene, tanba ema koalia Bahasa be ida tradutor nee mos koalia kotu-kotu deit, nee mak hanoin ita nia Governu hanesan komisaun amizade verdade lo-loos nee ami sira nee mak involve, tanba ami sira nee mak uluk hasoru malu, hanesan agora daudaun mos ami kuandu hasoru malu nee ami konta istoria uluk tiru malu halo nusa, sira kaer, se oho, sira konta ida nee,” dehan nia.
Lere dehan, joven sira mak tama ba komisaun amizade verdade maibe sira uluk seidauk moris, sira ba koalia saida kona-ba amizade verdade.
“Saudozu neebe lakon hanesan saudozu Daitula, Sabalae, sira neebe lakon nee, ita tenta ate agora seidauk, no enkontru formal sira nee laiha rezultadu, tenke haruka ami sira nee ba, ami konhese malu Jenerais Indonezia sira nee, ami konhese malu ate Prabowo agora Prezidente mos ami nain rua konhese malu, no konhese mos Komandante sira seluk Kiki Syanarki sira nee, Wiranto sira nee, ami konhese malu, ita konta istoria halimar ita tuur hamutuk informal konta istoria pois too Saudozu Nicolau Lobato katak uluk hanesan nee, maibe agora ba ho formal ema nunka fo sai,” dehan Lere.
Iha biban nee, Lere dehan Timor Leste hakarak hamriik mesak nuudar nasaun Republika Demokratika Timor Leste, mak halo ema barak mate iha funu laran too oras nee barak ruin seidauk hetan, tanba nee mak barak familia sira halo tuir tradisaun Timor nia bolu hodi halot iha semiteriu deit.
(eme)
