DILI, STLTIMORLESTE.com – Ministeriu Edukasaun (ME) halo esforsu oinsa iha tempu badak nia laran atu halo kolokasaun ba bolsa kandidatu (BK) profesores nivel sekundariu no ensinu baziku.
Haktuir Diretor Nasional Ensinu Sekundariu iha ME, Benjamin Gomes da Cruz Fernandes katak, kolokasaun BK profesores neebe atu halo nee ba nibel sekundariu mos, karik BK balun aseita atu hanorin iha nivel ensinu baziku nian, neebe mak lakohi nee mos laiha buat ida, maibe agora sei tau prioridade ba BK profesores ensinu baziku, tanba ensinu baziku mak profesores menus tebes.
“ME halo esforsu ezersisiu hela para oinsa iha tempu badak nian laran atu halo kolokasaun ba ita nian bolsa kandidatu professores, nibel ensinu sekundariu no Ensinu Baziku,agora sei halo servisu hela, para oinsa atu halo kolokasaun ba sira. Atu halo kolokasaun ba sira nee ami labele fo data, maibe ami hatete katak, molok fulan nee remata ami sei halo kolokasaun ida ba sira,” tenik Benjamin ba STL, Kinta (05/02/2026).
Iha fatin seluk Direitor Eskola Sekundariu Jeral FINANTIL, Aniceto Berlelo hatete, relasiona ho menus profesores iha sira nian eskola nee hatoo ona pedidu ba ministériu hodi nunee bele koloka profesores ba iha sira nian eskola.
“Ami nian profesores la too ka la sufisiente ida, nee ba materia portugues, tetum, inklui ba materia desportu ninia mos too agora seidauk iha profesores, maske iha maibe fleksibilidade sira hanorin, espesiál ba materia nee laiha, hau nian pedidu nee ami hatoo ona ba iha ME nee kleur ona,” dehan Aniceto.
Nia dehan, kona-ba konsesaun eskolar too agora seidauk tama, maibe sira submete ona relatóriu ba iha parte kompetente,no osan konsesaun nee rasik seidauk tama, neebe husi parte eskola nian hein deit, espera too tempu husi ME bele atribui osan ida nee.
Iha parte seluk Direitor Eskola Sekundariu Jeral 10 Dezembru Comoro,Manuel Verdial dehan, sira nian eskola sei menus profesores, konaba profesores nee sira sei presiza tan profesores ba lian português.
“Ami nian profesores nain rua mak tama ona reforma, profesores nain rua nee ba lian português, nee duni ami husu atu apoiu tan professores mai iha ami nian eskola,” nia deklara.
(jac)
