AMBENO, STLTIMORLESTE.com – Diretor Rejional Infraestrutura (DRI), Remigio Nuno Sila ho ekipa tekniku engineering Oecusse, iha loron Kinta (05/02/2026) observa progesu servisu Ponte Paut no estrada Oebaha too Ponte Bitopa, inklui barajen hodi satan komunidade nia uma husi mota sira iha Hauana, Suku Usitasae, Postu Administrativu Oesilo, kontinua observa progresu reabilitasaun estrada iha Kiupanaf, Suku Cunha, Postu Administrativu Pante Makasar, Rejiaun Administrativa Espesial Oecusse-Ambeno (RAEOA).
“Ita vizita projetu infraestrutura iha Oecusse, hahu observa uluk konstrusaun foun ba Ponte Paut neebe lokaliza iha Aldeia Oebaha, Suku Bobometo, Postu Administrativu Oesilo, kontinua kedan observa reabilitasaun estrada husi Ponte Paut Oebaha ba too Ponte Bitopa, Aldeia Hauana, Suku Usitasae, nunee observa progresu serbisu barajen ba protesaun natar no uma sira iha Hauana. Hafoin ida nee ita kontinua observa projetu reabilitasaun estrada iha Kiupanaf ho distansia 9 kilometru resin neebe konstrui husi Kompanhia Lifau Indah, Lda,” dehan Diretor Rejional Infeaestrutura, Remigio Nuno Sila ba STL iha Aldeia Kiupanaf, Suku Cunha, Postu Administrativu Pante Makassar, RAEOA.
Tuir nia observasaun ba projetu foun konstrusaun Ponte Paut, Aldeia Oebaha, neebe konstrui husi Kompanhia Bobometo, agora dadauk halo hela moru protesaun ba lengan jembatan neebe dadaun sira hahu ateiru ho rai henek, nunee mos separasaun mos ba betaun nee ka fui betaun ba plat ponte ninian.
“Kondisaun primeiru ita rekomenda ona para emprezariu Bobometo, Lda tenke uza grader atu halo rai nee tetuk, nomos uza fibrator hodi halo kompaksaun ka hanehan para rai nee metin mak hatuur besi iha ponte leten hodi bele bele aplika fui betaun ba ponte nee rasik,” dehan nia.
Nia dehan, maske kompanhia kesi ona besi beton iha ponte leten, kompanhia tenke hasai hodi halo tetuk rai lai, depois hanehan uza fibrator atu rai metin maka foin fui sumenti, kompanhia tenke halo ida nee, tanba halo obra tenke tuir orientasaun no matadalan kontratu neebe iha, tanba nee Diretor kompanhia orienta ba tekniku sira atu kompanhia labele fui sumenti lai hodi kompleta rekomendasaun neebe Obras Publiku propoin ona.
Relasiona ho asuntu nee, STL konfirma liu husi numeru Telefone ba kompanhia Bobometo, maibe labele responde tanba laiha linha.
Observa Obra Reabilitasaun Estrada Paut Too Bitopa
Hafoin ida nee, Diretor Rejional Infraestrutura RAEOA, Remigio Nuno Sila ho ekipa tekniku kontinua observa progresu serbisu reabilitasaun estrada husi Oebaha ba too Aldeia Hauana, Ponte Bitopa Suku Usi Tasae hodi normaliza kondisaun estrada nee husi Kompanhia Irmao Timor, Lda.
“Ita ohin mai observa reabilitasaun kontinuasaun ba estrada husi Oebaha ba too Ponte Bitopa neebe halao husi kompanhia Irmao Timor. Ita husu atu halo manutensaun ba estrada nee, tanba ami simu lamentasaun no rekomendasaun husi Komunidade sira uza transporte publiku no privadu liu husi estrada nee iha tempu udan difikulta sira nia movimentu iha tempu udan tanba rai dodok, tanba tahu nakonu iha estrada nee, serbisu retensaun nee tenke halo tanba nia serbisu falta 10% husi orsamentu neebe iha atu governu selu, maibe nia tenke reabililta estrada nee,” dehan nia.
Iha biban nee Remigio dehan, iha vizita nee atu halo moru protesaun ba komunidade nia uma iha Oebaha hahu husi ponte Bitopa too Hauana, nunee observa direitamente progresu serbisu reabilitasaun estrada husi Aldeia Sonamnasi ba Kiupanaf too Ban Afi ho distansia 9 kilometrus resin neebe konstrui husi Kompanhia Lifau Indah.
“Ita haree estrada nee diak ona maibe presiza kompanhia halo manutensaun ba Estrada nee, tanba fatuk boot balun monu taka movimentu transporte publiku, nomos estrada nee komesa nakfera ona, nunee ita husu ba kompanhia atu kontinua halo serbisu nee,” dehan nia.
Iha biban nee, Diretor Kompanhia Lifau Indah, Fernando mak via telefone, komprometidu iha semana ida nee nia laran sei mobiliza ekipamentus pezadu hanesan Loder no Exafator atu normaliza estrada Kiupanaf.
Tuir observasaun STL iha terenu, estrada no ponte kompanhia sira kontinua halo serbisu atu asegura obra estadu ba nesesidade povu, maibe estrada iha Kiupanaf mota boot, hahu kee dadaun rai iha foho hun, entaun ninia impaktu rai komesa nakfera, tanba nee DRI husu kompanhia atu kontinua halao serbisu atu asegura serbisu nee too remata hodi labele difikulta movimentu povu iha tempu udan.
(jos)
