DILI, STLTIMORLESTE.com – Leitura Domingu ohin bolu ema idak-idak atu sai masin no naroman ba maluk sira neebe sei iha nakukun laran.
Padre Selebrante, Acaçio de Castro, SDB hatete, leitura sira ohin loron atu fo hanoin katak, atu sai masin bá maluk sira neebe iha susar no iha nakukun nia laran, nunee dada sai sira husi nakukun bá iha moris neebe naroman tuir Maromak nia hakarak.
“Definisaun husi masin nee.mak tenke fahe, tenke simu no fo bá maluk sira bá buat neebe o halo diak ho o nia maluk sira, tulun sira halo sai diak tuir dalan neebe nai Maromak hanorin no Nia hakarak bá ita ema moris iha mundu nee,” dehan Padre selebrante nee liu husi nia omilia, iha Igreja Parokia Nossa Senhora de Grasa, Tasi-Tolu, Domingu (08/02/2026).
Padre Acasio katak, halo ita nia prezensa iha maluk sira nia leet sai hanesan fatin furak bá sira, hanesan halo buat neebe furak bá Maromak.
Sai masin hodi halo hahalok diak bá maluk sira, ajuda hadia ema seluk nia moris husi nakukun bá naroman.
Nia dehan, nuudar aman no inan tenke sai masin no naroman bá oan sira, hanorin oan sira mai misa iha loron Domingu. Hanorin sira ho liafuan diak no koalia lian mamar bá sira, atu nunee sira bele komprende ho diak.
Nuudar sarani tenke halo tuir obrigasaun iha moris loron-loron, tenke fahe buat neebe imi iha bá maluk neebe presiza imi nia tulun.
Leitura ohin loron atu haklaken Kristu neebe terus no haklaken Kristu neebe moris hias.
“Hanorin ita atu konhese Maromak no konhese ita nia aan rasik,” dehan nia.
Sai masin katak, atu sai provokador bá buat diak nian, provoka buat neebe la diak sai bá diak.
“Ita koko atu halo diak bá maluk seluk, ema neebe la diak ita provoka nia para atu sai diak, laos provoka atu hasae tensaun,” tenik Padre nee.
Tanba nee leitura ohin konvida sarani hotu atu sai masin bá maluk sira seluk neebe iha nakukun, bá sira neebe iha terus laran presiza tulun, bá sira neebe iha dalan la los presiza halos fodik sira nia dalan liu husi domin, tulun no hahalok neebe simples maibe iha valor bá iha ema seluk nia moris.
(dom)
