DILI, STLTIMORLESTE.com – Pasiente moras tuberkuloze (TB) neebe halo tratamentu iha Sentru Saude Komoro, kada semana rua iha fulan ida nia laran tenke kumpri foti aimoruk hodi hemu, atu nunee bele hamate kutun TB.
Pasiente Silveiro da Costa dehan, foufoun atu detekta moras nee, nia mai konsulta ho sintomas mear, isin manas, isin malirin no bee doko hela deit. Bainhira konsulta doutor haruka hasai raan kompletu no tafui kaben tasak, nunee rezultadu husi kaben tasak no raan nian nee mak doutor haruka tuir programa TB nian too fulan 6, karik seidauk diak kontinua too fulan 8.
Nia hatete, nia foin primeira vez hasoru moras nee no foin tuir programa tratamentu iha fulan Dezembru no tama ba Fevereiru nee halo fulan 3 ona.
Bainhira mai konsulta pesoal saude sira sei esplika uluk mak foin fo aimoruk hemu. Iha esplikasaun nee pesoal saude sira dehan, TB nee sei la kura bainhira la kumpri hemu aimoruk too fulan 6-8.
“Se ita hemu aimoruk la too remata, kutun TB sei forte liu tan deit no presiza aimoruk forte liu atu bele kura. Liafuan ida nee mak pesoal saude sira koalia antes atu simu aimoruk,” dehan nia bá STL iha Kampung Baru, Tersa (10/02/2026).
Nia hatutan, aimoruk neebe hemu nee kada semana rua hemu hotu tiha depois mak ba foti fali iha sentru saude. Nuudar pasiente tenke kumpri hemu aimoruk too fulan 6-8 nia laran.
Nunee mos Pasiente Natalia Pereira hatete, moras TB nee kumpri hemu aimoruk too fulan 6-8 nia laran para bele hamate kutun TB nian.
Tuir nia, tenke rona tuir liafuan neebe pesoal saude sira koalia katak, depois semana rua hemu hotu mai foti fali iha sentru saude sira hodi kontinua hemu too fulan 6-8 nia laran.
(dom)
