DILI, STLTIMORLESTE.com – Diretor Ezekutivu Fundasaun Mahein (FM), Nelson Belo prefere, Governu presiza kria komisaun independente ida hodi bele investiga klaru prosesu vaga rekrutamentu membru Polisia Nasional Timor Leste (PNTL) foun 2025.
Nia dehan, agora daudaun públiku preokupa ba prosesu rekrutamentu nee iha irregularidade, tanba nee husu suspende suspeitu lai prosesu nee, nunee identifika lo-loos no mos tenke kria komisaun independente ida hodi halo investigasaun klean nunee bele hetan ninian verasidade.
“Suspensaun hanesan horiseik ami dehan, maibe tenke bazeia ba investigasaun no hanoin katak Governu bele kria komisaun independente ida para bele halo investigasaun hodi rona alegasaun sira ne’ebé mak públiku rejista,” Diretór Ezekutivu Fundasaun Mahein (FM), Nelson Belo ba jornalista sira iha Komando Jeral PNTL Dili, Tersa (10/02/2026).
Nia tenik, komisaun nee tenke prienxe husi ema se deit, maibe ema nee profisionál no iha kredibilidade nunee atu rejista alegasaun husi públiku nian hodi fó solusaun alegsaun nee, husi aspeitu polítika no aspeitu legál.
Nia esplika, iha oportunidade hasoru malu ho Komandante Jerál nee mos aborda kona-ba preokupasaun husi públiku ba iha prosesu rekrutamentu neebe mak iha.
“Ami hatoo ami nia sujestaun ba iha Komando oinsá instituisaun nee halao nafatin nia knaar diak no lamentasaun sira neebe husi públiku husu Ministériu Interior atu bele responde kria mekanizmu oinsa para bele akumula lamentasaun sira nee, hodi nunee bele kria nafatin konfiansa husi públiku ba institusaun PNTL”, nia deklara.
Nia informa, Fundasaun Mahein laiha rekomendasaun ba vaga rekrutamentu PNTL nian.
“Enkontru nee kortezia, entaun ami la halo rekomendasaun ida ba Komando Jerál, maibe opiniaun neebe ami iha katak rekrutamentu ne’e komisaun sira neebe iha nee kontinua nafatin lao ba, maibé alegasaun neebe mak akontese públiku rejista ona, públiku iha fatin ruma hetan resposta hetan esplikasaun”, nia sublina.
Nia informa, fatin neebe mak públiku atu hetan preokupasaun nee mak Ministeriu Interiór tenke halo nia knaar bele halo esplikasaun oinsa mak alegasaun sira nee mosu no kompetensia Ministeriu Interior para bele hatan.
(jen)
