DILI, STLTIMORLESTE.com – Sarani Sentru Pastoral Santa Terezinha do Menino Jesus Kakaulidu ho entuziasmu simu Apostoladu Oratoriu Imaculada Coração de Maria ho Nossa Senhora do Rosario de Fatima, Nossa Senhora Virgem Peregrina de Fatubessi no Kristu Nai Liurai.
Ilas nain 4 Apostoladu Oratoriu Imaculada Coração de Maria ho Nossa Senhora do Rosario de Fatima, Nossa Senhora Virgem Peregrina de Fatubessi no Kristu Nai Liurai sai husi Parokia Motael hodi lao tama sai sentru idak-idak neebe tama iha Parokia Motael.
Iha Tersa kalan Sarani Sentru Pastoral Santa Terezinha do Menino Jesus Kakaulidu mak simu husi sarani sira husi sentru Pastoral Surikmas.
Antes entrega sarani sira husi Sentru Pastoral ho triste hatoo despedida adeus no agradese obrigada ba Apostoladu Oratoriu Imaculada Coração de Jesus ho Nossa Senhora do Rosario de Fatima, Nossa Senhora Virgem Peregrina de Fatubessi no Kristu Nai Liurai neebe hamutuk ona sira durante kalan 2 no loron rua iha sira nia fatin, hodi haree direita ona saida mak sira hasoru iha sira nia sentru laran.
Xefe Suku Bairo Pite, Joaninha Alves Soares liu husi aprezentasaun iha Kakaulidu, Tersa kalan (10/02/2026) hatete, senti kontenti tanba iha tempu ida ohin Parokia Motael bele loke ona liras ba katekese pastoral ho vizita ilas nain 4 neebe kobre iha parokia nia laran.
Prosesu tomak ami lao, preparasaun mak lao hanesan nee, ho kondisaun neebe iha ami fiar katak ho ilas nain 4 ho nia grasa no domin bele hametin ami nia fiar nuudar sarani no husu ba sentru Kakaulidu iha momentu ida ohin, aban no bainrua, ita hotu bele espresa ita nia sentimentu moris hanesan sarani, hanesan ema baibain atu hatoo direita ba Ilas nain 4 nunee ilas nain 4 bele saran liu ba iha aman Maromak hodi haraik iis moris no salvasaun iha ita nia suku laran,” dehan Xefe Suku.
Aleinde nee sarani sira husi Sentru Pastoral Santa Terezinha do menino Jesus simu ho bemvindu ba Ilas nain 4 liu husi poezia, Kantiku simu, Tara Tais kontinua lori Ilas nain 4 ba iha sentru laran ho prosesaun.
Iha biban nee Xefe Suku hatoo mos agradese ba Ilas Nain 4 ho fiar no tau esperansa domin no fiar nain ba Ilas nain 4 haraik grasa espíritu matenek, sabedoria iha suku nee bele moris hakmatek iha dame no domin nia laran, no antes husik fatin ida nee ba sentru seluk haraik hela esperansa moris domin nia ba sentru nee liu-liu ba joven sira hodi hasae devosaun fiar nia.
Nunee mos koordenador Aroutus de Evanjelho, Tome de Deus hatete, Apostoladu Oratoriu Imaculada Coração de Jesus nee hiit aan husi Portugal mai Timor Leste akompanha husi nain feto do Rosario de Fatima.
“Oratoriu nee vizita ona nasaun 78 no mai vizita Timor Leste tama ona ba nasaun 79, Oratoriu Imaculada Coração de Maria sai mahein sai patrono ba oratorio hotu-hotu iha mundu liu-liu oratorio idak-idak iha ita nia uma, tanba oratorio ida nee sai patrono sai mahein entaun kustume Timor ita nia fulan Rosario mak iha fulan Maiu no Outubru,” dehan nia.
Nia hatete, oratorio nee sai mahein ba oratorio hotu-hotu iha uma, entaun oratorio vizita la haree ba fulan Maiu no Outubru, maibe hanesan sarani katolika bele vizita iha sa fulan deit depende ba kooperasaun ho parokia sira.
Nia hatutan tan katak, Apostoladu Oratoriu Imaculada Coração de Maria akompanha Nossa Senhora do Rosario de Fatima, Nossa Senhora Virgem Peregrina de Fatubessi no Kristu Nai Liurai iha fulan Janeiru iha kooperasaun no orariu sira tama iha Parokia Motael hodi vizita sentru pastrol 15 neebe iha parokia motael nia laran.
Vizita Ilas Nain 4 iha Sentru Pastoral Santa Terezinha do menino Jesus durante loron 3 no kalan tolu hamutuk ho sarani sira hahu husi Tersa kalan too Kinta kalan hodi haree direita nia povu no sarani sira depois kontinua vizita ba sentru seluk.
(eme)
