DILI, STLTIMORLESTE.com – Ministru Edukasaun Interinu, Domingos Lopes Lemos halao abertura ba formasaun kona-ba “Information and communications technology” (ICT) ba Superintendente no Inspetor eskolar Munisípiu Bobonaro no Ainaro iha salaun Ian Martin INFORDEPE, Tersa (10/02/2026).
Tuir informasaun neebe STL asesu husi media ME, Kuarta nee (21/02/2026) hatete, iha abertura Ministru Edukasaun Interinu, Domingos Lopes Lemos hateten formasaun nee hanesan inspesaun ho abilidade atu uza ferramenta dijital avansadu no espesifikamente. Prátika ne’ sei garante katak, bainhira fila ba Ainaro no Bobonaro, prontu ona atu aplika kedas buat neebe aprende.
Inspesaun eskolar mak garante kualidade edukasaun nian. Se laiha inspesaun neebe ríjidu, labele asegura prestasaun kontas no responsabilizasaun.
“Nuudar Superintendente no Inspetor sira, ita-boot sira mak Ministeriu nia matan no tilun iha terrenu. Bainhira ami implementa sistema Inspesaun Dijitál, ami fo kbiit ba ita-boot atu halibur evidensia bazeia ba faktu real sira. Ida nee sei permite ami-nia desizaun polítika sira atu bazeia ba dadus konkretu sira”, dehan Governante nee.
Nia afirma, Ministériu Edukasaun hakarak eskola hotu-hotu iha Timor Leste, maske iha fatin neebe dook, sente prezensa husi ekipa inspesaun ida neebe profisional, modernu no efisiente. Tan nee husu Inspetor no Superintendente nia dedikasaun masimu durante tuir formasaun nee.
Abertura formasaun refere akompana husi Diretora Jeral Plano Polítika Inkluzaun Informatika, Odília das Dores Ung Martins no Sub-Inspetor Nukleu Administrasaun Finansas, Jerimeas Gomes no Dirijente sira. Formasaun refere fasilita husi IGED, DNSIT no GALA.
Superintendente no Inspetór Eskolár hamutuk nain 42, formasaun nee halao durante loron rua hahu husi loron 10 fulan Fevereiro 2026 sei remata iha loron 12 fulan nee.
(dom)
