AMBENO, STLTIMORLESTE.com – Deputadu Natalino do Santos haruka sai jornalista nasional destakadu iha Rejiaun Administrativa Espesial Oecusse-Ambeno (RAEOA) neebe hola parte iha audiensia Komisaun A, asuntu Justisa no Konstitusional iha Parlamentu Nasional (PN) ho Autoridade RAEOA iha Gabinete Autoridade RAEOA.
“Hau husu jornalista iha salaun nee husi media neebe deit, sai husi salaun nee, tanba ami koalia destinu nasaun nian, iha salaun laran nee so media Parlamentu Nasional deit, fora husi nee, sai ba liur no husu ba diretor rejional sira hotu atu haree asuntu nee,” dehan Deputadu Natalino dos Santos ho lian makaas, Kinta (12/02/2026).
Hafoin alerta husi Depuradu Natalino, jornalista nasional destakadu iha Oecusse husi Media RTTL, Tatoli, STL, Timor Post, no media lokal Lifau Press hamamuk fatin enkontru ho oin triste, tanba audiensia nee Media Officer Gabinete Prezidente Autoridade RAEOA mak husu Jornalista Nasional destakadu iha Oecusse hodi halo kobertura ba audiensia nee.
Enkontru nee halo iha Salaun Gabinete Prezidente Autoridade (GPA) Oebau, Suku Costo, Postu Administrativu Pante Makassar, RAEOA.
(jos)
