DILI, STLTIMORLESTE.com – Ministeriu Edukasaun (ME) too agora seidauk simu dokumentus klaru husi Eskola Sekundariu Nobel da Paz, tanba nee seidauk bele atribui konsesaun eskolar ba eskola refere.
Asuntu nee hatoo husi Diretor Nasional Ensinu Sekundariu iha ME,.Benjamin Gomes da Cruz Fernandes ba STL, Kinta nee (12/02/2026).
“Eskola Nobel da Paz nee too agora ami seidauk atribui, tanba too agora seidauk haruka dokumentus neebe klaru mai ami. Prosesu nee iha tribunal, nee duni depende ba tribunal mak sei desidi katak, osan nee atribui ba se, tanba ida nee husi tribunal mak sei desidi,” nia dehan.
Benjamin hatutan, kona-ba konsesaun eskolar nian, agora sei nafatin, tanba sei hein orsamentu hodi bele ezekuta, dadus kuaze husi eskola sira tama hotu ona, hein atu halo pagamentu mak haree ba iha orsamentu, eskola provadu sira mos kada tinan nafatin hetan konsesaun eskolar, relatóriu konsesaun nee husi eskola provadu no públiku hatama hotu ona.
Iha fatin seluk, Diretor Eskola Sekundariu Nobel da Paz, Jeremias P. de Jesus hatete, los duni katak Ministériu Edukasaun seidauk fo konsesaun eskolar, tanba husu eskola Nobel atu rezolve lai problema ida nee, maibe daudaun nee ninia prosesu iha ona tribunal hodi hein ninia prosesu iha faze tuir mai.
“Ami nian problema entre fundador eskola nian nee agora dadaun ninia prosesu nee iha ona tribunal, tanba nee ho problema ida nee mak durante tinan haat nia laran ami la hetan konsesaun eskolar, bainhira rezolve los ona mak bele hetan osan ida nee, maibe ba tinan ida nee hau sei halo pedidu ida ba Ministériu liu husi Edukasaun Munisipiu Dili,” dehan nia.
Nia dehan, durante tinan hira nia laran sira hetan konsesaun eskolar husi governu liu husi Ministeriu Edukasaun, tanba nee sei halo pedidu ba Ministeriu, tanba problema nee ninia prosesu daudaun nee iha ona tribunal.
(jac)
