DILI, STLTIMORLESTE.com – Oras nee daudaun Institute Ciência Saude (ICS) simu estudantes foun ba faze datoluk nian no tuir planu sei simu estudantes foun too 500, maibe depende ba ema neebe ba rejístu.
Informasaun nee hatoo husi Reitor Institute Ciência Saude (ICS), Leao Borges ba STL, Kinta nee (19/02/2026).
“Ami simu estudantes foun ba faze primeiru no segundu nian remata tiha ona, agora daudaun ami simu estudantes foun ba faze datolu nian. Ami simu estudantes foun depende ba kandidatu foun neebe mak hakarak atu kontinua sira nian estudu iha ami nian Institute, nee duni ita depende ba ema neebe mai rejistu,” nia dehan.
Nia hatutan, maibe ICS nian planu hakarak atu simu estudantes foun too 500, maibe nee depende ba ema neebe mai, agora kona-ba dadus husi primeiru faze no segundu faze nee nain hira mak rejístu ona, nee dadus husi Komisaun mak hatene.
“Ami sei taka faze datoluk nee iha fulan ida nee nia laran. Ami iha departamentu hamutuk neen (6) maka hanesan infarmajen, parteira, farmacia, nutrisaun, laboratorium no desportu. Departamentu neen (6) nee mak daudaun nee iha,” katak nia.
Nunee mos Leonita Martins da Costa hanesan estudantes foun, departamentu parteira hatete, daudaun nee rejístu tiha ona atu kontinua ninia estudu iha area parteira ninia, rejistu dezde iha semana kotuk.
“Agora daudaun hau rejistu tiha ona atu bele kontinua hau nian estudu iha area parteira ninia, rejistu dezde iha semana kotuk,” nia esplika.
(jac)
