DILI, STLTIMORLESTE.com – Komisaun ba Rekrutamentu Juiz neebe haknaar aan ba Supremu Tribunal Justisa (STJ) mai relata progresu servisu ba Prezidente Republika (PR) Jose Ramos Horta.
Bainhira remata hasoru malu, Prezidente Komisaun, Avelino Coelho ba jornalista sira iha Palasiu Prezidensial Nicolau Lobato, Bairo Pite, Kinta (19/02/2026) hatete, ohin mai relata rezultadu progresu servisu ba rekrutamentu Juiz neebe haknaar aan ba Supremu Tribunal Justisa ba Prezidente Republika Jose Ramos Horta.
“Hau ho komisaria Doutora Carmelita nuudar membru Komisariu ba komisaun rekrutamentu Juiz ba Supremu Tribunal Justisa no ba Tribunal Rekursu ami nain tolu, maibe kolega okupadu la mai, ami nain rua mak mai audensia ho Prezidente Republika hatoo hela rezultadu servisu durante 30 dias nia,” dehan Prezidente Komisaun.
Prezidente komisaun dehan mai informa katak, dokumentus neebe nesesariu atu prosede ba rekrutamentu juri prontu ona, neebe parese iha semana balun mai tan ami sei halo ona rekrutamentu ba juri para bele kompoin ona juri ida mak hafoin loke konkursu ba Supremu Tribunal Justisa no Tribunál Rekursu, ida nee mak ohin ami hatoo hela ba sua exelensia Prezidente.
Mai rona mos Prezidente Republika Jose Ramos Horta nia opinaun nomos sujestaun balun liga ho rekrutamentu Juiz nee.
Karik halo rekrutamentu ba Juiz nee maizumenus ba Juiz nain hira, hatan ba kestaun nee Avelino hatete, agora sei iha fahe rekrutamentu ba juri, tanba tuir lei hatete katak presiza Juiz konselheiru husi sistema sivilista ho lian português.
Tanba nee loke ba Supremu Tribunal Justisa vaga 7 ba Tribunal Rekursu iha 9 no tuir lei organizasaun judisiariu iha espozisoens tranzitoriu Juiz neebe mak kareira servisu liu ona tinan 10 nia bele konkore, tantu supremu tribunal nomos Tribunal Rekursu, agora faze ida mai oin sei komesa uluk ho rekrutamentu juri.
Juri mak sei fo konkursu laos komisaun rekrutamentu, maibe komisaun administra deit prepara kondisaun, tanba nee dokumentus neebe atu tulun prosesu rekrutamentu juri ekipa komisaun finaliza ona atu regula komisaun reuniaun, regulamentu avaliasaun dokumental aprova ona manual ba juri aprovadu nomos kalendariu de atividade.
“Ohin mai hatoo hela ba Prezidente Republika katak, posiblidade 20 Agostu, 30 agosto ou 28 Setembru, data neebe komemorativu nee bele mos ita instala ona Supremu Tribunal Justisa iha tinan ida nee nia laran hafoin ita prosede ba Tribunal Rekursu,” katak nia.
Iha hasoru malu nee Prezidente Republika Jose Ramos Horta fo hanoin kona-ba kalendarizasaun, Prezidente defende ba rezultadu servisu komisaun rekrutamentu no selesaun Juiz nia.
Komisaun neebe sei halo Rekrutamentu Juiz ba Supremu Tribunal Justisa mak Prezidente Komisaun, Avelino Coelho, Carmelita Monis no Pedro Camoes.
(eme)
