DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ikus ba prosesu primeiru interogatoriu, deside aplika medida Prizaun Preventiva ba arguidu nain 2 ho inisial JMSAA no JEXP.
Arguidu nain 2 lori mai iha Tribunal, husi parte Ministeriu Publiku promove ho krime Furtu Agravadu.
Juiz turnu halo tiha indentifikasaun ba arguidu nain rua, hodi deside tama ba iha alegasaun. No iha faze alegasaun Ministeriu Publiku husu Tribunal atu aplika medida Prizaun Preventiva ba arguidu nain rua.
Enkuantu husi parte defeza nian husu Tribunal atu aplika medida Aprezentasaun Periodika ba arguidu nain rua.
Rona tiha alegasaun, ikus mai Juiz deside aplika medida Prizaun Preventiva ba arguidu nain rua, tanba konsidera iha indisus forte.
Hafoin despaisu husi Tribunal, Defeza arguidu nain rua nian, Defensor Publiku Jose da Silva katak, arguidu nain rua antes nee iha ona antesedensia kriminal ba krime hanesan naok motor.
Jose dehan, arguidu nain rua nee ida uluk mai julga iha Tribunal, idade minoridade Tribunal liberta tiha, maibe agora kontinua pratika aktu hanesan, lori mai iha Tribunal idade boot ona, tanba nee Tribunal deside aplika hotu medida ba arguidu.
“Sira nain rua Tribunal deside aplika medida Prizaun Preventiva hotu,” dehan Defensor Publiku, Jose da Silva ba jornalista sira iha Tribunal Dili, Kinta (19/02/2026).
Nia hatutan, Tribunal aplika medida refere, tanba konsidera iha indisus forte ba krime neebe MP promove mai iha Tribunal.
Nia sublina, hanesan defeza sei simu tiha despaisu husi Tribunal mak defeza sei haree no estuda.atu halo rekursu ka lae.
Nia argumenta, medida neebe Tribunal aplika atu asegura deit arguidu sira ba iha prosesu investigasaun, kuandu produs ona akuzasaun lori mai iha Tribunal halao julgamentu ona mak foin haree los duni ka lae. Tanba iha Tribunal sei rona parte hotu nia deklarasaun mak foin tama ba iha desizaun.
Tuir kronolojia katak, arguidu nain rua deskonfia naok motor rua pertense ba vitima AEMB no SRS, iha Merkadu Manleuana. Nunee iha loron 15 fulan Fevereru tinan 2026, autoridade seguransa detein arguidu nain rua.
Prosesu primeiru interogatoriu nee prezide husi Juiz estajiadu Cipriano da Fatima Sarmento, Ministeriu Publiku reprezenta husi Prokurador Napoliao Soares da Silva no arguidu hetan asistensia legal husi Defensor Publiku Jose da Silva.
(ter)
