DILI, STLTIMORLESTE.com – Konselhu Ministru halao sorumutu iha Auditoriu Kay Rala Xanana Gusmão, aprova ona projetu Rezolusaun Governu nian neebe aprezenta husi Primeiru Ministru, Kay Rala Xanana Gusmão, neebe aprova Polítika no Planu Asaun ba Promosaun Ekonomia Tasi ida neebe Reziliente no Sustentavel iha Timor Leste.
“Ho aprovasaun ba rezolusaun ida nee, Governu estabelese vizaun polítika no estratejia asaun IX Governu Konstitusional ba setor ida nee ba tinan sanulu oin mai,” haktuir nota komunikadu imprensa neebe STL asesu husi media Ministru Prezidensia Konsellu Ministru, Sesta (20/02/2026).
Politika ida nee sei koordena direta husi Primeiru Ministru, ho apoiu husi Gabinete Fronteiras Terrestres no Maritimas no mos Unidade Ekonomia Azul, hodi garante koordenasaun entre ministeriu no parseiru relevante sira.
Politika ida nee mos organiza bazeia ba eixu sira neebe promove investigasaun no literasia kona-ba tasi, protesaun ba biodiversidade tasi nian, utilizasaun sustentavel ba rekursus inklui peskas, agrikultura, turizmu no enerjia renovavel sira, nunee mos reforsu ba transporte maritimu no dezenvolvimentu portuariu.
Prevee mos fortalesimentu husi governasaun tasi nian, integrasaun husi medidas hodi adapta ba mudansa klimatika no kriasaun mekanizmus finansiamentu, monitorizasaun no avaliasaun nian.
“Ho desizaun ida nee, ezekutivu konsolida ninia kompromisu ba tasi nuudar pilar ida husi dezenvolvimentu nasional, ho objetivu atu promove kriasaun empregu, hadia kondisaun moris husi populasaun tasi-ibun sira no proteje ekosistema sira, iha kuadru kreximentu ida neebe sustentavel no inkluzivu,” tenik komunikadu.
(alb)
